ქუთაისის აიამ crocobet დიდი 10-ის მიმდინარე სეზონის ფლეი ოფის პირველ მატჩში თბილისის ხვამლი 45:27 დაამარცხა და ჩემპიონობისთვის ბრძოლას აგრძელებს.
აია არენაზე მასპინძლებმა პირველ ტაიმში შეცდომები დაუშვეს და 15 ქულით ჩამორჩნენ, მაგრამ მეორე ტაიმში სრული დომინაცია მოიპოვეს და საბოლოოდ დამაჯერებლად იმარჯვეს და ფლეი ოფის მეორე ეტაპზე გავიდნენ.
მასპინძლებმა საწყის 20 წუთში შეცდომები მრავლად დაუშვეს და ხვამლი 15 ქულით დაწინაურდა: ზაურ ლუტიძემ და ლაშა მალაღურაძემ ლელოები, ხოლო ლუკა თაყაიშვილმა თითო გარდასახვა და ჯარიმა გაიტანა. ამის შემდეგ ქუთაისელები გამოცოცხლდნენ და გიორგი ფრუიძემ ერთი საპასუხო ლელო გაიტანა, მაგრამ გიორგი ვარდოსანიძემ იქვე უპასუხა და 5:20.
აი, შესვენების შემდეგ მოედანზე სხვა აია გავიდა და 10 წუთში გაათანაბრა: გივი კაშიამ და ათუკა ზვიადაძემ ლელოები გაიტანეს, რასაც გიორგი ბაბუნაშვილმა გარდასახვა და ჯარიმა შემატა; 57-ე წუთზე მასპინძლები ომარ ჯანგავაძის ლელოთი დაწინაურდნენ, ზვიადაძე ლელოში კიდევ სამჯერ შევიდა, რომელთაგან ერთი თემურ ძოძუაშვილმა გარდასახა, ერთიც ჯარიმა შეაგდო და მატჩის ბედი გადაწყვიტა.
აიას მეტოქე რუსთავის ხარები იქნება, რომელმაც ლელო ბოლო წუთზე გატანილი ლელო-გარდასახვით 7:3 დაამარცხა.
პირველი ტაიმის არასარაგბო ანგარიშით, 0:0 დამთავრდა. შესვენების შემდეგ პეტრე ხუციშვილმა ჯარიმით ანგარიში გახსნა და ასე გრძელდებოდა ბოლო წუთამდე, სანამ მიკელი როკონდინონო გამარჯვების ლელოს გაიტანდა. მოძღვრიშვილმა რთული პოზიციიდან გარდასახა და საბოლოო შედეგი დააფიქსირა.
აია ხარებს ფლეი ოფის მეორე ეტაპზე 5 აპრილს ქუთაისში შეერკინება. ერთი დღით ადრე, ბათუმი შინ მეორე ქუთაისურ გუნდს, არესს უმასპინძლებს და გამარჯვებული ფინალში გავა, ხოლო დამარცხებული ფინალის საგზურისთვის აია-ხარებს შორის გამარჯვებულს ეთამაშება.
