დიდ 10-ში ლიდერი შეიცვალა

crocobet დიდი 10-ის მერვე ტურის პირველ მატჩში, მოქმედმა ჩემპიონმა ბათუმმა და ბრინჯაოს მედალოსანმა რუსთავის ხარებმა გამარჯვებული ვერ გამოავლინეს და მიმდინარე სეზონში მეორე ფრე დააფიქსირეს – 14:14.

„ბათუმი არენაზე“ სტუმრებმა პირველი ტაიმი უკეთ ჩაატარეს და შესვენებაზე რვაქულიანი უპირატესობით გავიდნენ. მეხუთე წუთზე ხარებმა მოლი ააგორა და გელა მახარაშვილმა ლელო გაიტანა, ხოლო დავით მოძღვრიშვილის გარდასახვა ძელმა აისხლიტა, მაგრამ მერე ჯარიმა გაიტანა და ხარები 8:0 დაწინაურდა.

მეორე ტაიმის დასაწყისში მოძღვრიშვილმა კიდევ ერთი ჯარიმა შეასრულა დდა სხვაობა 11 ქულამდე გაზარდა. ბათუმმა იქვე კარგი შეტევით უპასუხა და რომა მახათაძემ ლელო გაქვითა, ბუბა ნოზაძემ კი, გარდასახა. ტაიმის შუაში მოძღვრიშვილმა ჯარიმით სტუმართა უპირატესობა შვიდ ქულამდე აიყვანა. მასპინძლებს გარდასახული ლელო სჭირდებოდათ, ამიტომ ტემპს უმატეს და გიორგი წიკლაურმა ლელო ძელებსშუა გაიტანა, ნოზაძემ კი გარდასახვით წონასწორობა აღადგინა.

დრო კიდევ იყო, მაგრამ ანგარიში აღარ შეცვლილა. მატჩის საუკეთესო მოთამაშე ბათუმის ცენტრი კავეკინი ტაბუ გახდა.

ბათუმელთა წაფორხილებით ისარგებლა ქუთაისის არესმა, რომელმაც სტეფანწმინდის ყაზბეგს ბონუს ქულით, 44:24 სძლია, „სარბიელის სინიც“ შეინარჩუნა, სატურნირო ცხრილის სათავეშიც მოექცა და ბათუმს სამი ქულით უსწრებს.

რიონისპირელებმა თავიდანვე შეძლეს უპირატესობის მოპოვება და მასპინძლებს შვიდი ლელო გაუტანეს. ყაზბეგმა ბოლომდე იბრძოლა და მეტოქეს ოთხი ლელოთი უპასუხა, არესი ბონუს-ქულის დაკარგვის საფრთხის წინაშეც აღმოჩნდა, მაგრამ ბოლო შეტევაში თავი კარგად დაიცვა. სტეფანწმინდელები 11 ქულით ბოლო ადგილზე არიან.

მატჩის საუკეთესო მოთამაშე ქუთაისელი შოთა ხელაძე გახდა.