თორნიკე შენგელია კატალონიიდან დუბაიში წავიდა

საქართველოს ეროვნული ნაკრების კაპიტანი თორნიკე შენგელია კარიერას არაბეთის გაერთიანებული საამიროების გუნდ დუბაიში გააგრძელებს. ქართველი კალათბურთელი არაბულ კლუბს ბარსელონადან შეუერთდა. გამოსასყიდი თანხა, 900 000 ევრო, საქართველოს ნაკრების კაპიტანმა თავად გადაიხადა, რის შემდეგაც თავისუფალი აგენტი გახდა.

შენგელიამ დუბაისთან ხელი ორწლიან კონტრაქტს მოაწერა. ჩვენებური ახლა კლუბში კვლავ ითანამშრომლებს მთავარ მწვრთნელ ხავი პასკუალთან, რომლის ხელმძღვანელობითაც წინა სეზონში ბარსელონაში თამაშობდა.

ქართველ კალათბურთელს ახალ კლუბში არაერთი სახელოვანი ვარსკვლავი დახვდება. გუნდში კლემენ პრეპელიჩი, დავიდ ბერტანსი, ელი ოკობო, მილოუკი ბაქსთან ერთად NBA-ს ჩემპიონი მამადი დიაკიტე, ჯასტინ ანდერსონი და სხვა ცნობილი კალათბურთელები არიან.

თორნიკე შენგელია დუბაის ქომაგებს მოკლე ვიდეოთი მიესალმა:

“მოგესალმებით, დუბაის ფანებო. მინდა გითხრათ, რომ აქ გადმოსვლით ძალიან აღელვებული ვარ და მოუთმენლად ველი როდის მომეცემა თქვენს წინაშე თამაშის საშუალება. იმედი მაქვს, მომავალ სეზონში ბევრ წარმატებას მივაღწევთ. მალე შევხვდებით”.

ქართველ კალათბურთელს აქამდე, ბარსელონას გარდა, ვალენსიაში, შარლერუაში, პეპინსტერში, ბრუკლინში, ჩიკაგოში, ბასკონიაში, ცსკა-სა და ბოლონიაში უთამაშია.

აღსანიშნავია, რომ დუბაი ევროლიგის ახალ სეზონში სწორედ ესპანურ გრანდებთან მატჩებით დაიწყებს: 24 სექტემბერს მადრიდის რეალს უმასპინძლებს, 29 სექტემბერს კი – ბარსელონას.

ავტორი: კახა მიხანაშვილი.