ილია მეოთხე და ორი ბრინჯაო

იაპონიაში ძიუდოს ერთ-ერთი ყველაზე პრესტიჟული ტურნირი, ტოკიოს გრანდ სლემი დაიწყო და საქართველოს დელეგაციამ პირველივე დღეს სამი მედალი მოიპოვა – ოქრო და ორი ბრინჯაო.

მამაკაცთა შორის 100 კილოგრამამდე წონით კატეგორიაში ილია სულამანიძემ სამხრეთ კორეელი ჯუიეოპ ჰანი დაამარცხა, ვისაც შემდეგ რუსები მიაყოლა – ნიაზ ბილალოვი და მატვეი კანიკოვსკი. სამი მოგებით ილია ფინალში გავიდა და ოქროს მედლისთვის იაპონელ დოტა არაის დაეჭიდა, წუთსა და 24 წამში იპონზე დასცა და მეოთხე ქართველი გახდა, ვინც ტოკიოს გრანდ სლემი მოიგო.

90 კილოგრამამდე წონით კატეგორიაში გიორგი ჯაბნიაშვილმა მერვედფინალში რუსი ეგორ მალკინს დაჯაბნა, მაგრამ მეოთხედფინალში იაპონელ გოკი ტაჯიმასთან წააგო და მედალს რეპეშაჟშიდან შეუტია. იქ კი ჯერ იაპონელ ჰიდეტოში ტოკუმუჩის მოუგო, ხოლო ბრინჯაოსთვის იტალიელ ტიციანო ფალკონეს.

ქალთა შორის ბრინჯაოს მედლებისთვის იჭიდავა ეთერ ლიპარტელიანმაც (57კგ). ეთომ სამხრეთ კორეელი იუნა შინი გაიარა, მაგრამ მეოთხედფინალში მასპინძელ აკარი ომორისთან წააგო რეპეშაჟში გადაინაცვლა, სადაც ბრაზილიელ შარლენ ნასიმენტოს აჯობა და ბრინჯაოსთვის ფრანგ სარა ლეონი სისიკის შეხვდა, ვისთანაც აქამდე ცხრავე ჭიდაობა ჰქონდა წაგებული, მაგრამ ნავსი ტოკიოში გატეხა მედალი ირგუნა.

დღესვე ტატამიზე ირაკლი დემეტრაშვილი (+100) და ნინო ლოლაძე (57) გავიდნენ, მაგრამ უმედლოდ დარჩნენ.