კვარაცხელიას გოლი და პსჟ-ს მორიგი ტიტული

კატარი დედაქალაქ დოჰაში FIFA-ს საკონტინენტთაშორისო თასის ფინალი გაიმართა, რომელშიც ერთმანეთს ჩემპიონთა ლიგის გამარჯვებული პარი სენ-ჟერმენი ლიბერტადორესის მომგებ ბრაზილიურ ფლამენგოს გაეჯიბრა. ტიტული ევროპულ კლუბს დარჩა – პსჟ-მ პენალტების სერიაში 2:1 მოიგო.

38-ე წუთზე ანგარიში ხვიჩა კვარაცხელიამ გახსნა, რომელმაც დეზირე დუეს დარტყმულს დაამატა. ისიც უნდა ვთქვათ, რომ ამ მომენტში ბრაზილიელთა მეკარე უხეშად შეცდა და ჩვენებურსაც მერე გატანა არ გასჭირვებია.

ტაიმი პსჟ-მ კი მოიგო, მაგრამ ეს უპირატესობა მეორე ტაიმის 62-ე წუთზე ხელიდან გაუშვა – მარკინიოსმა პენალტი „აიკიდა“ და ჟორჟინიომ ზუსტად დაარტყა.

დარჩენილ დროში გოლი არ გასულა და საქმე მატჩის შემდგომ პენალტების სერიამდე მივიდა. პარიზელებმა ცუდად დაარტყეს: ოქროს ბურთის წლევანდელმა მფლობელმა და FIFA-ს ვერსიით საუკეთესო ფეხბურთელმა უსმან დემბელემ ააცილა, ხოლო ბრედლი ბარკოლას მეკარემ აუღო. თუმცა, ბრაზილიელებმა კიდევ უფრო ცუდად დაარტყეს და მატვეი საფონოვმა ოთხი პენალტის მოგერიება მოახერხა.

კვარაცხელიამ, რომელიც ლუის ენრიკემ 90-ე წუთზე შეცვალა, პარი სენ-ჟერმენში 2025 წელს მეხუთე ტიტული მოიგო.