მწვრთნელის და კაპიტნის განსხვავებული კომენტარები

საქართველოს წყალბურთელთა ნაკრებმა ევროპის 2026 წლის ჩემპიონატი მე-10 ადგილზე დაასრულა.

ათანასიოს კეჩაგიასის გუნდმა ევროპირველობაზე შვიდი მატჩი ითამაშა: პირველ ჯგუფურ ეტაპზე საბერძნეთთან (6:20), ხორვატიასთან (7:18) და სლოვენიასთან (22:11); მეორე ჯგუფურ ეტაპზე იტალიასთან (14:16), რუმინეთთან (10:15) და თურქეთთან (14:11); მეცხრე ადგილისთვის საფრანგეთთან (13:16).

ტურნირის დასრულების შემდეგ მთავარმა მწვრთნელმა და გუნდის კაპიტანმა რეზი იმნაიშვილმა განსხვავებული კომენტარები გააკეთეს.

ათანასიოს კეჩაგიასი

„საფრანგეთთან მარტივი თამაში არ იყო. საერთო ჯამში, კმაყოფილი ვარ. გუნდმა ბოლომდე იბრძოლა და დიდი ძალისხმევა გამოავლინა. ერთ დღეში თამაშების ჩატარება მარტივი არაა, კმაყოფილი ვარ იმ შრომით, რაც წყალბურთელებმა გასწიეს. მზადებისთვის ერთ თვეზე ნაკლები დრო გვქონდა, ამიტომ, მაქსიმუმი გააკეთეს და კმაყოფილი ვარ. ტურნირის შემდეგ ყოველთვის საჭიროა ანალიზი, გაუმჯობესებაზე მუშაობა და იმ შედეგის მიღწევა, რაც ყველას სურს. მომავალში მაქსიმუმს გავაკეთებთ იმ შედეგისთვის, რომლითაც მოთამაშეებიც კმაყოფილები იქნებიან და სრულიად საქართველოც“.

რეზი იმნაიშვილი

„მოლოდინი უფრო მეტი გვქონდა, ყოველდღე ვმუშაობდით, რომ რვა გუნდში მოვხვედრილიყავით. რა თქმა უნდა, გულდასაწყვეტია. კი, რაღაც მომენტები კარგი იყო, მაგრამ საერთო ჯამში კმაყოფილები ვერ ვიქნებით. საფრანგეთთანაც შეგვეძლო მოგება, ჩვენი შეცდომებიდან გამომდინარე წავაგეთ, რაც მეტოქემ გამოიყენა, შეგვეძლო გამარჯვება, მაგრამ გვაჯობეს. დამწუხრებულები ვართ, მაგრამ შრომას და ენერგიას არასდროს ვიშურებთ და არც ეს იქნება გამონაკლისი, რომ შემდეგში უკეთესები ვიყოთ“.

შეგახსენებთ, საქართველოს წყალბურთელთა ნაკრებმა ევროპის ჩემპიონატზე ზედიზედ მეორედ დაიკავა მე-10 ადგილი. სულ კი შვიდ ევროპირველობაზე აქვთ ნათამაშები და საუკეთესო შედეგი მერვე ადგილია.