პირველი მატჩები შენგელიას გარეშე?! – ექიმების რეკომენდაცია

საქართველოს ნაკრები ევრობასკეტ 2025-სთვის მზადებას კვიპროსში, კაპიტან თორნიკე შენგელიასთან ერთად აგრძელებს. შენგელიამ მოსამზადებელი მატჩები გამოტოვა და ნაკრებს კვიპროსში შეუერთდა.

ჩვენებურებს ჯგუფის წილისყრაში დიდად არ გაუმართლათ – მასპინძელი კვიპროსისა და ბოსნია&ჰერცოგოვინას გარდა საქართველოს კონკურენცია ტურნირის ფავორიტებთან, ესპანეთთან, იტალიასთან და საბერძნეთთან მოუწევს.

ესპანური გამოცემა Marca იტყობინება, რომ ექიმები ნაკრების კაპიტანს, თორნიკე შენგელიას, საწყისი მატჩების გამოტოვებას ურჩევენ:

“გულის არითმიის გამო ექიმებმა თორნიკეს ურჩიეს, რომ საწყისი ორი შეხვედრა გამოტოვოს, თუმცა შენგელიას ორივე შეხვედრაში მონაწილეობის მიღება ნებისმიერ ფასად სურს. ესპანეთთან მისი თამაში ნაკლებად სავარაუდოა, იტალიასთან კი თამაშის ალბათობა გაცილებით მაღალია.

თუ შენგელია ესპანეთის წინააღმდეგ პარკეტზე გამოვა, ის საკუთარ ჯანმრთელობას დიდი საფრხის წინაშე დააყენებს”, – წერს მარკა.