რამაზ სვანაძე: ჩვენსა და გერმანიას შორის დიდი სხვაობაა

საქართველოს 21 წლამდე ნაკრებმა ევროპის ჩემპიონატის საკვალიფიკაციო ეტაპზე ზედიზედ მეორე მარცხი განიცადა. რამაზ სვანაძის გუნდმა გერმანიასთან 0:2 წააგო.

მატჩის შემდეგ მთავარმა მწვრთნელმა მარცხის მიზეზებსა და პრობლემებზე ისაუბრა.

„ყველაფერი ლოგიკურია, ძალიან დიდი სხვაობაა დღეს ჩვენს შორის, რა თქმა უნდა, ვგულისხმობ გერმანიის და საქართველოს ახალგაზრდულ ნაკრებებს. ძალიან გაგვიჭირდა, რაც ვიცოდით. ჩემი ფეხბურთელები მაქსიმუმს აკეთებენ, დღესაც ასე იყო, დაცვით ფაზაში რა დავალებებიც მივეცით, ეცადნენ და ნორმალურად შეასრულეს. თუმცა, სერიოზული პრობლემები გვქონდა ბურთის ფლობაში, განსაკუთრებით შეტევაში, ამ მხრივ, სამუშაო ძალიან ბევრია…

ნებისმიერი დანაკლისი, თუნდაც ერთი ფეხბურთელები იყოს, უდიდესია. ძალიან რთული იყო პროცესში ამ ყველაფრის შეცვლა, რადგან წინა შეკრებებზე, დაცვასა და საყრდენ ზონაში სულ სხვა ფეხბურთელები თამაშობდნენ, ისინი ყველაზე მთავარ მატჩებში გამოგვაკლდნენ. თუმცა, იმ ბიჭებზე საპრეტენზიო არაფერი მაქვს, ვინც მათ ცვლიან, ყველაფერს აკეთებენ, რომ მივიღოთ ის შედეგი, რაც ყველას გვინდა…

სამწუხაროდ, პანდემიის გამო ამ თაობას მთლიანად გაუცდა 17 წლამდე შესარჩევი და მთელი ორი წელი გაჩერებულები იყვნენ. შემდეგ 19-წლამდელებში ძალიან ცოტა თამაშის ჩატარება მოუწიათ, რომელიც გამოცდილების არქონის გამო რეალურად წარუმატებელი პერიოდი იყო. ისინი დარჩნენ საერთაშორისო პრაქტიკის გარეშე და უამისოდ ასეთ დონეზე თამაში წარმოუდგენელია. ამ ყველაფერს ეტაპობრივად, შეკრებიდან შეკრებამდე ახლა გავდივართ“, – თქვა სვანაძემ.

შეგახსენებთ, საქართველოს 21 წლამდე ნაკრები ხუთი ტურის შემდეგ ხუთი ქულით მეოთხე ადგილზეა. ჩვენი გუნდი 10 ქულით ჩამორჩება ლიდერ საბერძნეთს, შვიდით – მეორეადგილოსან გერმანიას.

მომდევნო ტურში საქართველო 27 მარტს, ლატვიის ახალგაზრდულ ნაკრებს უმასპინძლებს.