როგორ ჩაანაცვლებს სანიოლი ჩაკვეტაძეს და კიტეიშვილს?

საქართველოს ნაკრები 4 სექტემბერს მსოფლიოს ჩემპიონატის საკვალიფიკაციო ციკლს თურქეთთან შეხვედრით იწყებს, თუმცა მთავარი პრობლემა უკვე ცნობილია – გუნდს ვერ დაეხმარებიან გიორგი ჩაკვეტაძე და ოთარ კიტეიშვილი, რომელთა მნიშვნელობაც ვილი სანიოლის სქემაში დიდია.

ჩაკვეტაძის გარეშე თამაში ნაკრებს დიდი ხანია უწევს, თუმცა კიტეიშვილის ტრავმა სულ ბოლო დღეებში დადასტურდა და სწორედ ამან აიძულა მთავარი მწვრთნელი, გეგმებს თავიდან გადახედოს.

ოპტიმალურ პირობებში სანიოლი ნახევარდაცვას ქოჩორაშვილით, კიტეიშვილითა და ჩაკვეტაძით აწყობდა, ახლა კი ორი საყრდენი მოთამაშის ჩანაცვლება აუცილებელი ხდება. სწორედ ამიტომ ფრანგ სპეციალისტს ორი ალტერნატივა რჩება:

სარისკო ვარიანტი – 3-4-2-1 ტაქტიკის გამოყენება. ამ შემთხვევაში ქოჩორაშვილთან ერთად ცენტრში ანზორ მექვაბიშვილი ან ნოდარ ლომინაძე აღმოჩნდება, რაც ნახევარდაცვას რაოდენობრივად ასუსტებს, თუმცა შეტევაში ნაკრებს სიძლიერეს უნარჩუნებს. თუ მთავარი მიზანი თურქეთთან გამარჯვებაა, შესაძლოა ეს ნაბიჯი გამართლდესაც.

უფრო ფრთხილი გზა – 3-5-2 ან 3-5-1-1 სქემა, სადაც ცენტრში სამი ნახევარმცველი იქნება. ასეთ შემთხვევაში მექვაბიშვილსაც და ლომინაძესაც ძირითადში ვიხილავთ. ეს არჩევანი დაცვით კომპონენტში უფრო საიმედოა, თუმცა შეტევითი პოტენციალი შედარებით მცირდება.

ამრიგად, სანიოლის წინაშე დგას რთული არჩევანი – უფრო აგრესიული თამაში, რომელიც მოგებას უპირატესად ემსახურება, თუ უსაფრთხო მიდგომა, რომელიც ნაკრების კარს სანდოობას შემატებს.