საქართველოს რაგბის ნაკრებმა ნოემბრის ტესტ-მატჩები გამარჯვებით გახსნა. რიჩარდ ქოქრილის შეგირდებმა ბათუმში აშშ-ს ნაკრებს უმასპინძლეს და 43:30 დაამარცხეს.
შეიძლება ითქვას, რომ მატჩში ერთი ჩავარდნა გვქონდა, როდესაც ამერიკელებმა სამი ლელო დადეს. დანარჩენი დრო მეტოქეზე უკეთ გამოვიყურებოდით და გამარჯვება გვეკუთნოდა.
დასაწყისი ჩვენი იყო – მოლით აგორებული შეტევა ქვათაძემ ლელოში დაასრულა. სწორედ ამის შემდეგ იყო ჩავარდნა და სამი ლელოს შემდეგ აშშ 21:7 დაწინაურდა. არადა, გასული 20 წუთი არ იყო. ამის შემდეგ ავთამაშდით და პირველივე ტაიმში ასევე სამით ვუპასუხეთ. აქედან ერთი ისევ მოლით, რომელიც ბექა გორგაძემ დაასრულა, ხოლო ორჯერ ხელდახელ გავათამაშეთ ბურთი და ორივეჯერ ლელოში გიორგი კვესელაძე შევიდა. თუმცა, პირველ შემთხვევაში კარგი თამაში არც ვასილ ლობჟანიძეს უნდა დავუკარგოთ, ხოლო მეორეჯერ ჯერ ნინიაშვილმა ითამაშა ჩინებულად, შემდეგ კი, შველიძემ კარგად შეუშვა ლელოში კვესელაძე. თედო აბჟანდაძის ერთი გარდასახვა ძელს მოხვდა და 26:21 დავწინაურდით. ტაიმის ბოლომდე ამერიკელებმა ჯარიმა გაიტანეს და სხვაობა ორ ქულამდე დაიყვანეს.
მეორე ტაიმის დასაწყისში ამერიკელებმა არეკნი გაიტანეს და კიდევ ერთხელ დაინაურდნენ – 27:26. ამის შემდეგ უპირატესობას ისევ ჩვენები დაეუფლნენ, რამდენიმე ჯარიმა კარში არ დაარტყეს, ლელოზე ითამაშეს და მორიგმა მცდელობამ შედეგი გამოიღო – ლუკა ჯაფარიძემ რაქიდან ბურთი ლელოში გადადო, აბჟანდაძემ გარდასახა – 33:27.
ამის შემდეგ თედომ ერთი ჯარიმაც კარშიც დაარტყა და გუნდს ის უპირატესობა მისცა, რომ მეტოქე გარდასახული ლელოთი ვერ დაწეოდა. ამიტომ ამერიკელებმა სტრატეგიულად ითამაშეს – ჯარიმით შეიმცირეს სხვაობა და ლელოზე თამაში შემდეგ სცადეს.
არ გამოუვიდათ. პირიქით, ნინიაშვილის მორიგი ჩინებული თამაშის შემდეგ აფრასიძემ ლელო გაიტანა, რომელიც აბჟანდაძემ გარდასახა და საბოლოო ანგარიში დააფიქსირა.
