საქართველო მეშვიდე ტიტულისთვის ესპანეთს შეერკინება

22 ნოემბერს საქართველოს 18 წლამდელთა ნაკრები ზედიზედ მეათედ ითამაშებს ევროპის ჩემპიონატის ფინალს და მეშვიდედ ეცდება ტიტულის მოგებას. პრაღის „მარკეტა სთედიუმზე“ საქართველოსა და ესპანეთის მატჩი 21:30 საათზე დაიწყება.

სხვათა შორის, ესპანეთს ფინალში მესამედ ვეთამაშებით. გასულ წელს 32:11 დავამარცხეთ. ხოლო 2019 წელს – 20:10.

გეტყვით იმასაც, რომ ფინალისკენ მიმავალ გზაზე საქართველომ მეოთხედფინალში პოლონეთი 64:7, ხოლო ნახევარფინალში მასპინძელი ჩეხეთი 26:7 დაამარცხა. თავის მხრივ ესპანეთმა ჯერ ბელგიას სძლია 64:0, მერე კი ნიდერლანდებს 52:0 და ფინალს ისე უწია, ქულა არ გაუშვია.

დავუბრუნდეთ ახლანდელ ფინალს, სადაც დებულების თანახმად, განაცხადში მყოფ 26-ვე მორაგბეს ფინალში თამაშის უფლება ექნება. თუმცა, როგორც წესი, თამაშის წინა დღის ძირითადი და სათადარიგო შემადგენლობა ცხადდება. ჩვენი გუნდის მთავარმა მწვრთნელმა ზურაბ ამონაშვილმა ჩეხეთთან მატჩის შემდეგ სასტარტო შემადგენლობაში რამდენიმე ცვლილება განახორციელა.

საქართველოს ნაკრების შემადგენლობა:

ხაზი: ლუკა ჭაკუა, დავით არობელიძე, დათა ახვლედიანი, გიორგი კეკელია, ლუკა ტაბატაძე, ლევან ბუცხრიკიძე, გოგა უშვერიძე;

შერკინება: საბა მშვილდაძე, ლუკა წიკლაური, გიორგი ბერძენიშვილი, ანდრია ბილანიშვილი, ნიკოლოზ ჩხორთოლია, გიორგი ზაზაძე, გიორგი არძენაძე, მათე ბერუაშვილი;

მარქაფა: გოჩა ფიცხელაური, ლუკა ბარბაქაძე, იაგო ღუდუშაური, გიორგი ქევანიშვილი, საბა გიორგიძე, ალექსანდრე გაგუა, გიორგი გაბუნია, გიორგი მუშკუდიანი, ავთანდილ ზვიადაძე, მათე მახარაძე, ლუკა შულაია.