ტოიოტა ჩელენჯი აფრიკასა და საქართველოში გაიმართება

შავი ლომი ივნისში სამხრეთ აფრიკულ ტურნეზე გაემგზავრება და „ტოიოტა ჩელენჯის“ ფარგლებში, ადგილობრივ წამყვან გუნდებთან სამ მატჩს გამართავს. აღსანიშნავია, რომ ჩელენჯის ფარგლებში მომდევნო სამი მატჩი უკვე თბილისში გაიმართება.

შავი ლომი „ტოიოტა ჩელენჯში“ მეორედ მონაწილეობს. 2025 წლის ოქტომბერში ჩიტასს ორჯერ ეთამაშა: პირველ მატჩში მასპინძლები 39:38 დაამარცხა, მეორეში კი, აფრიკელებმა 24:5 იმარჯვეს.

წელს ტურნირი განასხვავებული, გაუმჯობესებული ფორმატით ტარდება და ექვსი გუნდი მონაწილეობს – სამი აფრიკული და სამი ევროპული. შესაბამისად, თითოეულ ევროპულ გუნდს, სამ სამხრეთ აფრიკულ გუნდთან მოუწევს შერკინება.

2026 წლის „ტოიოტა ჩელენჯში“ ითამაშებენ სამხრეთ აფრიკული ტოიოტა ჩიტასი, აირლინკ პუმასი და სუზუკი გრიქასი; ხოლო წვეული გუნდები არიან შავი ლომი, პორტუგალიის ნაკრები და რუმინეთის ა ნაკრები.

5 ივნისს, შავი ლომი პუმასს ეთამაშება, 10-ში – გრიქასს, ხოლო 14-ში ჩიტასს.

დავით კაჭარავა: საქართველოს რაგბის კავშირის პრეზიდენტი:

„ტურნირი შავი ლომის მიზნებს სრულად შეესაბამება. მინდა მადლობა გადავუხადო სამხრეთ აფრიკის რაგბის კავშირსა და ჩიტასს ასეთი შესაძლებლობისთვის. ტურნირს განვითარების უზარმაზარი პოტენციალი აქვს. ვფიქრობ, მომავალში კიდევ უფრო დიდ მნიშვნელობას შეიძენს. შესაბამისად, მისი დაარსება და მონაწილეობა, ქართული რაგბისა და შავი ლომისთვის უდიდესი წარმატებაა“.