24 მაისს ეროვნული ლიგის 15-ე ტური იწყება. ცენტრალური მატჩი „დინამო არენაზეა“ – თბილისის დინამო ქუთაისის ტორპედოს უმასპინძლებს. ეს იქნება რიგით 99-ე ქართული კლასიკო, რომელიც ყოველთვის განსაკუთრებულ ინტერესს იწვევს. ორი ისტორიული კლუბი, ორი განსხვავებული საფეხბურთო ქალაქი და ათწლეულების განმავლობაში დაგროვილი პრინციპული დაპირისპირება – სწორედ ეს ხდის ამ მატჩს ეროვნული ლიგის ერთ-ერთ ყველაზე მნიშვნელოვან მოვლენად.
„დინამო არენაზე“ კიდევ ერთი მძიმე და ემოციური ბრძოლა გაიმართება. მიუხედავად იმისა, რომ ბოლო წლებში ქართულ ფეხბურთში ახალი კონკურენტებიც გამოჩნდნენ, დინამო და ტორპედო კვლავ იმ კლუბებად რჩებიან, რომელთა დაპირისპირებასაც განსაკუთრებული ისტორია და ატმოსფერო აქვს.
დინამო საქართველოს ყველაზე ტიტულოვანი კლუბია. გუნდი ქართული ფეხბურთის სიმბოლოდ ითვლება – კლუბი, რომელმაც საბჭოთა პერიოდში ევროპული ფეხბურთიც კი გააოცა და 1981 წელს თასების მფლობელთა თასი მოიგო. დინამოს მაისურს ქართულ ფეხბურთში განსაკუთრებული მნიშვნელობა აქვს.
მეორე მხარეს კი, ტორპედოა – კლუბი, რომლის მთავარი ძალა ყოველთვის მისი გულშემატკივარი იყო. ბოლო წლებში ტორპედომ არაერთხელ დაამტკიცა, რომ შეუძლია ქვეყნის საუკეთესო გუნდებთან თანაბარ ბრძოლაში შესვლა. ქუთაისური ატმოსფერო, ემოციური ტრიბუნები და აგრესიული ფეხბურთი ხშირად მეტოქეებისთვის სერიოზულ პრობლემად იქცევა.
ამ მატჩს სატურნირო დატვირთვაც აქვს. სეზონის გადამწყვეტ ეტაპზე თითოეული ქულა განსაკუთრებით მნიშვნელოვანია. ორივე გუნდი კარგად ხვდება, რომ ასეთ თამაშებში შეცდომის ფასი ძალიან მაღალია. დინამო საკუთარ მოედანზე ფავორიტად ითვლება, მაგრამ ტორპედომ არაერთხელ დაამტკიცა, რომ მსგავს შეხვედრებში სტატუსს დიდი მნიშვნელობა არ აქვს.
განსაკუთრებული ყურადღება დაცვით თამაშსა და სწრაფ კონტრშეტევებზე იქნება გამახვილებული. დინამოს ბურთის კონტროლი და პოზიციური შეტევები მისი მთავარი იარაღია, ხოლო ტორპედო სივრცეების გამოყენებასა და სწრაფ გადასვლებზე აკეთებს აქცენტს. სწორედ ტაქტიკური ბრძოლა შეიძლება გახდეს ამ შეხვედრის გადამწყვეტი ფაქტორი.
ევროპული მასშტაბებით ეს მატჩი დიდი ტურნირების ყურადღების ცენტრში არ ექცევა, საქართველოში კი მისი მნიშვნელობა ყოველთვის განსაკუთრებულია. დინამო-ტორპედოს ჯახის დროს, საქმე მხოლოდ სამ ქულას აღარ ეხება – ეს პრესტიჟის, ისტორიისა და გულშემატკივრების ემოციების ბრძოლაა.
სადღეისოდ, სატურნირო ცხრილშიც მეზობლად არიან: ტორპედო 23 ქულით მეორეა, ხოლო დინამოს ქულით ნაკლები აქვს და მეოთხეა. დინამომ ბოლოს მოუმატა – მთავარ მწვრთნელად თემურ ქეცბაიას მისვლის შემდეგ და ექვს მატჩში ოთხი მოგება და ორი ფრე აქვს. ტორპედოს კი, უკვე 10 ტურია არ წაუგია…
როგორც ზემოთ ვთქვით, ეს 99-ე კლასიკოა. წინა დაპირისპირებებში ბალანსი ასეთია: დინამომ მოიგო 50 მატჩი, ტორპედომ – 20. კიდევ 28 შეხვედრა ფრედ დასრულდა. ბურთების შეფარდებაც დედაქალაქელების მხარეს არის – 157:86.
აქედან გამომდინარე ისეთი მატჩია, რომელიც კიდევ ერთხელ შეახსენებს ყველას, რომ ქართულ ფეხბურთში ისტორიული დაპირისპირებები კვლავ ცოცხალია…
დინამო-ტორპედოს მატჩი, “დინამო არენაზე”, 19:00 საათზე დაიწყება.
