ბოლო დროს ბათუმის დინამოს მიმართ ბევრი ჭორ-მართალი გავრცელდა. განსაკუთრებულად საუბარი გუნდის ახალ მფლობელზე მიდის და მომავალ მფლობელსაც ასახელებენ – არჩილ ბერიძის ნაცვლად ბათუმურ კლუბს თემურ მიქელაძეს უკავშირებენ.
ამჟამინდელმა პრეზიდენტმა, არჩილ ბერიძემ გუნდში მიმდინარე პროცესებზე პირველი კომენტარი პირველ არხთან გააკეთა.
„ბათუმის დინამოს გარშემო ძალიან ბევრი მითქმა-მოთქმაა. არ მინდა, ყველა ბათუმელის, აჭარელისა და მთელი საქართველოს საყვარელი გუნდი სპეკულაციის ობიექტი გახდეს. უახლოეს პერიოდში პრესკონფერენციას გავმართავ და ყველაფერს დეტალურად ავხსნი.
მთავარი მინდა იცოდეთ – ბათუმის დინამო ჩემთვის არასდროს ყოფილა ბიზნესი. ეს იყო ჩემი ვალდებულება ბათუმელების, ფეხბურთის ფედერაციისა და ხელისუფლების წინაშე, რომელმაც გუნდი გარკვეული პირობებით გადმომცა.
წარმოუდგენელი რამ გაკეთდა როგორც ინფრასტრუქტურული, ისე სპორტული თვალსაზრისით. ყოველთვის ქართული ფეხბურთისა და ბათუმის დინამოს მიმართ სიყვარული და წინსვლის სურვილი მამოძრავებდა“, – განაცხადა ბერიძემ.
შეგახსენებთ, ბერიძე ბათუმის დინამოში 2017 წელს მივიდა. მისი მუშაობის პერიოდში გუნდმა ისტორიაში ყველაზე მეტი ტიტული მოიპოვა: ორჯერ გახდა ეროვნული ლიგის ჩემპიონი; სამჯერ – ვიცე-ჩემპიონი; ერთხელ საქართველოს სუპერთასის გამარჯვებული.
თუმცა, სადღეისოდ გუნდში სხვაგვარი მდგომარეობაა. გუნდი მაღალი მიზნებისთვის ვეღარ იბრძვის, პლუს დაუგროვდა დავალიანება. გავრცელებული ხმებით, ეს დავალიანება 25 მილიონ ლარამდეა.
ამასთან, ბერიძეს საფეხბურთო საქმიანობა ორი წლით აკრძალული აქვს. 2024 წელს აჭარული კლუბის პრეზიდენტმა მატჩის ოფიციალურ პირებს მიაყენა სიტყვიერი შეურაცხყოფა, ხოლო ერთ-ერთ მსაჯს – ფიზიკური.
ეს არ იყო პირველი დისკვალიფიკაცია – ბერიძე, ასევე მსაჯების შეურაცხყოფისთვის, 2022 წელსაც დაისაჯა და სტადიონზე შესვლა (როგორც საშინაო, ასევე საგარეო მატჩებზე) ერთი წლით აეკრძალა. თუმცა, ბერიძე სტადიონზე პირველი დისკვალიფიკაციის დროსაც ჩნდებოდა და მეორეს შემთხვევაშიც.
