კრისტალბეთ ეროვნული ლიგის მეშვიდე ტური დასრულდა, რომელიც ძალიან საინტერესო და დაძაბული გამოდგა.
გაგრა-ტორპედო 2:2
გაგრა ტორპედოსთან ჯერ აგებდა, შემდეგ იგებდა, საბოლოოდ კი შეხვედრა ფრედ დასრულდა.
სწრაფი გოლი ვნახეთ: ტორპედოელთა კაპიტანმა ვლადიმერ მამუჩაშვილმა დიეგო დეისაძის პასით გაიტანა; პირველი ტაიმის ბოლოს ანდრი ანდრეიჩუკმა კუთხურიდან ჩაწოდებულ ბურთს ერთი შეხებით დარტყმა მიაყოლა და ანგარიში გაათანაბრა;
58-ე წუთზე ილია სკრიპნიკის გოლით გაგრა წინ წავიდა; მერე ვნახეთ ფელიპე პირესის გოლი: ბრაზილიელის დარტყმული პენალტი ოლეკსანდრ ვორობეიმ მოიგერია, მაგრამ დამატებაზე პირესმა იმარჯვა და 2:2.
გაგრა ჯერჯერობით ბოლო ადგილზეა, ტორპედო მეხუთეზე.
დინამო (თბ)-მეშახტე 1:1
დინამო თბილისსაც და მეშახტესაც შვიდ მატჩში ხუთი ფრე მოუგროვდათ. ამ ტურამდე თანაბარი ქულები ჰქონდათ და ასეც გაგრძელდა.
28-ე წუთზე დინამო განელმა ნანა-კოფი დონკორმა დააწინაურა; ოთხ წუთში კი ცოტნე ფაცაციამ ვარდნაში დარტყმით გაათანაბრა.
მეორე ტაიმი ახალი დაწყებული იყო, როცა ბარნს ოსეიმ მეორე გაფრთხილება მიიღო და დინამო ათი კაცით დარჩა, მაგრამ გაძლო და ფრეს გამორჩა.
სამგურალი-დილა 0:1
გორის დილამ სტუმრად სძლია წყალტუბოს სამგურალს. ბოლო წუთები იყო, როცა მამინ სანიანგი მარცხნიდან შეიჭრა საჯარიმოში, მერე დაარტყა და ბურთი კარში აღმოჩნდა. რიკოშეტიც დაეხმარა. სანიანგი გამბიელია, დილას ახალწვეული გახლავთ.
სპაერი-რუსთავი 1:1
ეროვნული ლიგა 2-დან დაწინაურებული გუნდები მშვენივრად გამოიყურებიან. მეორე-მესამე ადგილებზე არიან.
მე-13 წუთზე რუსთავი დააწინაურა პრინს ოსეიმ, რომელმაც სოლომონ კესის ეფექტური პასი გამოიყენა, მეკარესთან პირისპირ გასულმა კი ზუსტად დაარტყა; სპაერმა მეორე ტაიმის საწყის წუთებში გაათანაბრა: გიგა სამხარაძის კუთხური და გუნდის კაპიტნის, ნიკოლოზ კენჭაძის ზუსტი თავური ვნახეთ – 1:1.
დინამო (ბთ)-იბერია 0:3
მოქმედმა ჩემპიონმა ბათუმში გაიმარჯვა და სამქულიანი ჰანდიკაპით ლიდერობს.
იბერიელებმა მე-10 წუთზე გახსნეს ანგარიში – გოლი პაატა ღუდუშაურმა შეაგდო; 58-ე წუთზე ბათუმელთა მცველმა ლუკა ლაკვეხელიანმა საჯარიმოში ვახო ბედოშვილი წააქცია, პენალტი გიორგი ჯინჯოლავამ ზუსტად შეასრულა; ბოლოს არმელ ზოურის ჩაწოდებას ამირან ძაგანიას ერთი შეხებით დარტყმა მოჰყვა – 0:3.
