ნახევარი საუკუნე საბჭოთა თასიდან

3 სექტემბერს, საქართველოს სპორტის ჟურნალისტთა ასოციაციის თაოსნობით, დინამო არენაზე ახალი მემორიალური დაფა გაიხსნა.

მანამდე უკვე არსებობდა საბჭოთა კავშირის პირველი ჩემპიონობისა (1964 წელი) და UEFA-ს თასების მფლობელთა თასის (1981) მომგები თბილისის დინამოს მემორიალური დაფები. მათ შეემატათ საბჭოთა კავშირის თასის პირველი მოგება. ეს 1976 წელს მოხდა და მას შემდეგ ზუსტად ნახევარი საუკუნე გავიდა.

ეს იყო მეექვსე ფინალი და პირველი ტიტული. მანამდე იყო ხუთი წაგებული ფინალი და ყველა მოსკოვის გუნდებთან. 50 წლის წინ კი, მოსკოვში, ლუჟნიკებზე, ერევნის არარატს 3:0 ვაჯობეთ. საბჭოთა კავშირის თასის მოგება კი, ქართული გუნდისთვის პატარა და სახუმარო ამბავი ნამდვილად არ იყო.

მემორიალის გახსნას ესწრებოდნენ ფინალის მონაწილეები: დავით გოგია, ნოდარ ხიზანიშვილი, ფირუზ კანთელაძე, შოთა ხინჩაგაშვილი, ალექსანდრე ჩივაძე, მანუჩარ მაჩაიძე, ვლადიმერ გუცაევი, რევაზ ჩელებაძე. მათ გარდა შემადგენლობაში იყო ზორბეგ ებრალიძე, რომელიც საზეიმო ღონისძიებას ვერ დაესწრო. ასევე აწ გარდაცვლილები – დავით ყიფიანი და ვახტანგ კოპალეიშვილი. შეცვლაზე შევიდა ასევე აწ გარდავლილი ზურად წერეთელი. სათადარიგოთა სკამზე დარჩნენ – მალხაზ გაგოშიძე, დავით მუჯირი, ვახტანგ ქორიძე და გოჩა მაჩაიძე.

ბარემ გეტყვით რომ, ფინალში გოლები ყიფიანმა, კანთელაძემ და ჩელებაძემ გაიტანეს.

ასევე შედგა ილია ბაბუნაშვილის წიგნის – „ჩემი გაზაფხულის ფეხბურთი“ პრეზენტაცია და ფილმის – ახალი გუნდი (ფინალი #6) პრემიერა.