საქართველომ ჯგუფიდან გასვლის შანსი დაკარგა

ერევანში მიმდინარე ევროპის ჩემპიონატის B დივიზიონის ჯგუფურ ეტაპზე საქართველოს 20 წლამდე კალათბურთელთა ნაკრებმა ბოლოსწინა მატჩი დანიასთან 74:85 წააგო და A დივიზიონში გადასვლის შანსი დაკარგა. მეტიც, უფრო დიდი შანსია ბოლო ადგილზე გავიდნენ.

კოტე ტუღუშის გუნდს მატჩის დასაწყისშივე გუნდის ერთ-ერთი ლიდერი ავთანდილ ბახტაძე გამოაკლდა, რამაც გარკვეული გავლენა კი იქონია, მაგრამ სკანდინავიელებთან მოგება გვჭირდებოდა. თუმცა, არაფერი გამოვიდა და ჩვენებმა ყველა მეოთხედი წააგეს.

გასულ მატჩში კოტე ტუღუშის გუნდში საუკეთესო ლუკა ლომთაძე იყო, რომელმაც 23 ქულა ჩააგდო, თენგო გოგიშვილმა კი 13 ქულა მიითვალა.

არადა, ბოლო ტურის წინ C ჯგუფში მეტად საინტერესო ვითარებაა და ეს ყველაფერი საქართველოს გარეშე ჩაივლის… ავსტრიის ნაკრები 3 მოგებითა და 1 მარცხით ლიდერობს; შვეიცარიას, ნიდერლანდებს, ჩრდილოეთ მაკედონიასა და დანიას 2-2 მოგება-წაგება აქვთ; საქართველოს მხოლოდ ერთი მოგება. ბოლო ტურში ჩვენები ნიდერლანდელებს ეთამაშებიან, ავსტრია შვეიცარიას გაეჯიბრება, ხოლო ჩრდილოეთ მაკედონია – დანიას.