სუპერლიგაში მოუგებელი ერთი გუნდი დარჩა

სუპერლიგის მე-10 ტური სამი მატჩით დაიწყო. ერთი რამ ნათელი იყო – ორი მოუგებელი გუნიდან ამ ტურის შემდეგ ერთი დაღჩებოდა.

ორი აუტსაიდერი რაში და გურჯაანის დელტა ერთმანეთს ეთამაშებოდნენ. თბილისური გუნდი რვიდან წაგებით იყო, გურჯაანული – ცხრიდან ცხრით. მატჩის მნიშვნელობიდან გამომდინარე დიდი ბრძოლა იყო მოსალოდნელი, მაგრამ ასე არ მოხდა. რაშმა მეტოქეს დამაჯერებლად აჯობა – 79:63.

ბრძოლა იყო მოსალოდნელი თსუ და კსუ-ს მატჩშიც. სტუდენტურ დერბიში კავკასიელებს რომ ემარჯვათ, გუნდები ერთმანეთს მოგებებითაც და წაგებებითაც უთანაბრდებოდნენ, ხოლო თსუ-ს მოგება სუპერლიგის ლიდერობას მოუტანდა.

თავიდან თსუ დაწინაურდა და წინ 10 ქულითაც გაიჭრა, შემდეგ კსუ-ს ჯერი დადგა და სერიოზული გაქცევაც მოაწყო – 23:5 მოიგო.

გარდამტეხი მესამე პერიოდი გამოდგა, რომელიც თსუ-მ 37:16 მოიგო და მეტოქე საბოლოოდ გატეხა. საბოლოოდ, თსუმ 93:80 მოიგო.

დღის ბოლო მატჩი გორში გაიმართა, რომელიც ყველაზე დაძაბული გამოდგა. ერთმანეთს თანაბარი შედეგის (5 მოგება, 3 წაგება) მქონე ივერიონი და ბათუმი შეხვდნენ. გარდამავალი უპირატესობით მიმიდნარე შეხვედრა მასპინძელთა გამარჯვებით დასრულდა – 80:78.

მე-10 ტურის დარჩენილი ორი მატჩი 21 დეკემბერს გაიმართება: რუსთავი მარგვეთს უმასპინძლებს, ხოლო ქუთაისი – ვსა-ს.