შედეგიანი მამუკელაშვილი და ბითაძის მორიგი ორმაგი

NBA-ში რეგულარული სეზონის დასრულებამდე ერთი ტურია დარჩენილი და ფლეი ოფში გასასვლელად ორივე ქართველის გუნდი იბრძვის. შეიძლება ორივე გავიდეს, უარეს ვარინტში კი, ერთი აუცილებლად გავა, მეორე კი, იმავეს გაკეთებას შემოვლითი გზით შეეცდება.

გოგა ბითაძის ორლანდომ სტუმრად ჩიკაგოს 127:103 მოუგო და შანსი დაიტოვა. გოგამ კი, მორიგი კარგი მატჩი ჩაატარა და ისევ ორმაგი დუბლით გამოირჩა. ჩვენებურმა მოედანზე 16:37 წუთი დაჰყო, რა დროშიც 15 ქულა, 11 მოხსნა, 1 ჩაჭრა და 2 დაფარება მიითვალა. ბითაძემ შვიდიდან ექვსი ორქულიანი და სამივე საჯარიმო ჩააგდო. მისი მოედანზე ყოფნის პერიოდში ფლორიდელებმა მეტოქეზე ოთხი ქულით მეტი ჩააგდეს.

ორლანდოს შანსი სანდრო მამუკელაშვილის ტორონტომ დაუტოვა, რომელიც სტუმრად, ნიუ იორკთან, 95:112 დამარცხდა.

სანდრომ მოედანზე 25 წუთი გაატარა და გუნდში ქულებითაც და მოხსნებითაც ყველაზე შედეგიანი იყო – 17 ქულა, 8 მოხსნა, სამი პასი და 1 ჩაჭრა. მამუმ სამიდან ორი ორქულიანი, ექვსიდან სამი სამქულიანი და ექვსიდან ოთხი საჯარიმო ჩააგდო. ოასივში ოთხი დაკარგვაც ჰქონდა, მისი მოედან ყოფნისას კი, ტორონტომ სამი ქულით ნაკლები ჩააგდო

ტორონტოსა და ორლანდოს ერთნაირი მაჩვენებლები აქვთ – 45 მოგება და 36 მარცხი. კანადელები გამსვლელ, მეექვსე ადგილზე არიან, ხოლო ორლანდო მეშვიდეზე. ბოლო ტურში გაირკვევა ვინ მოხვდება მათგან ფლეი ოფში. თუმცა, არის კიდევ ერთი შანსი – ატლანტან უნდა წააგოს და ორივე ჩვენებურის გუნდმა მოიგოს. ამ შემთხვევაში ფლეი ოფში ორივე პირდაპირ გავა.

13 აპრილს ორლანდო ბოსტონს ეთამაშება, ხოლო ტორონტო – ბრუკლინს.