ავთანდილ ასათიანი: ფინალამდე მისვლა ვისწავლეთ

18 სექტემბერს საქართველოს ფუტსალის ნაკრები ევროპის ჩემპიონატის საკვალიფიკაციო ეტაპის ფლეი ოფის პირველ მატჩს გამართავს. ავთანდილ ასათიანის გუნდი, თბილისის ოლიმპიურ სასახლეში სლოვაკეთის ნაკრებს უმასპინძლებს.

მოახლოებულ მატჩთან დაკავშირებით ჩვენი ნაკრების მთავარმა მწვრთნელმა, ავთანდილ ასათიანმა ისაუბრა:

„ნაკრებმა ძალიან ბევრი მნიშვნელოვანი მატჩი ჩაატარა და ამ მხრივ ბიჭები მომზადებულები არიან. ტაქტიკურად და თეორიულად ნაყოფიერი შეკრება გავიარეთ. ვფიქრობ, მზად ვართ თამაშისთვის, მაგრამ, საბოლოოდ, ყველაფერი მოედანზე გადაწყდება.

სწორედ ამისთვის იყო შესარჩევი ეტაპი – აქამდე რომ მოვსულიყავით. კარგია, რომ ვისწავლეთ ფინალამდე მისვლა და ვფიქრობ, სლოვაკეთთან ორ მატჩში ბევრი რამ გამოჩნდება.

დიდ იმედს ვამყარებ ჩვენს გულშემატკივრებზე, რადგან მათ გარეშე ძალიან გაგვიჭირდება. მოვუწოდებ ყველას, რომ გვერდით დაგვიდგნენ და ერთად დავიმსახუროთ ევროპის ჩემპიონატზე გასვლა“.

სლოვაკეთთან სათამაშოდ საქართველოს ნაკრების შემადგენლობა ასეთია:

მეკარე: თორნიკე ბუკია, ბექა ტყემალაძე (ორივე ნიუ-ვიჟენ ჯორჯიანსი), ლუკა ხარშილაძე (ისტიკლოლი, ტაჯიკეთი);

წინა ხაზი: ლევან სვანიძე, გიორგი ხაბალაევი, ნიკოლოზ კურტანიძე (ყველა პსპ), გიორგი ჩიმაკაძე, არჩილ სებისკვერაძე (ორივე კსუ), ვახტანგ კეკელია, ირაკლი თოდუა, ვახტანგ ჯვარაშვილი, ნიკოლოზ გაბრიჩიძე, ნუკრი ჭუმბურიძე, საბა ტყეშელაშვილი, შოთა თოფურია (ყველა ნიუ-ვიჟენ ჯორჯიანსი), გიორგი ღავთაძე (ტიუმენი, რუსეთი), ნიკა ხარატიშვილი (ისტიკლოლი, ტაჯიკეთი).

საქართველო-სლოვაკეთის მატჩი ოლიმპიურ სასახლეში 20:00 საათზე დაიწყება. მატჩზე დასწრება თავისუფალია.