გურული რინგზე ხელმა აღარ გაუშვა

ლაშა გურული მსოფლიო ჩემპიონატზე ოდენ ბრინჯაოს მედალს დასჯერდა. ცხადია, ასეთი დონის ტურნირზე ნებისმიერი სინჯის მედალი საამაყო და დასაფასებელია, თუმცა დასანანი ის არის, რომ ქართველ მოკრივეს ტრავმის გამო ფინალში გასასვლელად აღარ უბრძოლია.

ინგლისის ქალაქ ლივერპულში მიმდინარე მსოფლიო ჩემპიონატზე ლაშა გურული ნახევარფინალამდე სამი მეტოქის დამაჯერებლად ძლევით მივიდა და იქ უზბეკ მეტოქეს უნდა დაპირისპირებოდა, თუმცა…

ქართველმა მოკრივემ სპეციალური განცხადება სოციალურ ქსელში გაავრცელა ხელის დაზიანების გამო ჩემპიონატს ჩაეხსნა და გადაწყვიტა სრულფასოვანი სარეაბილიტაციო კურსი გაიაროს.

„პირველ რიგში მადლობა უფალს ყველაფრისთვის, რაც ცხოვრებაში ხდება. მადლობა ჩემს ოჯახს, გულშემატკივარს, რადგან წლების განმავლობაში ვხედავ და ვგრძნობ მათ დაფასებას და სიყვარულს.

რაც შეეხება მსოფლიო ჩემპიონატს, ნახევარფინალში ვარ და ბრინჯაოს მედალი გავინაღდე, თუმცა სამედიცინო კვლევის, ექიმისა და გუნდის გადაწყვეტილებით ნახევარფინალში აღარ მივიღებ მონაწილეობას. სამივე ბრძოლის ჩატარება ტრავმირებული ხელით მომიწია და ბრძოლიდან ბრძოლამდე იმ მდგომარეობამდე მივიდა, რომ შეუძლებელი გახდა ტურნირის გაგრძელება.

ექვსი წელია მსოფლიოს და ევროპის ჩემპიონატებიდან, ოლიმპიური თამაშებიდან მედლის გარეშე არ დავბრუნებულვარ. დიდი სიამაყეა, როდესაც კვარლცხბეკზე მდგომი საქართველოს დროშას ვუყურებ. ამჯერად მიზანშეწონილია გავიარო სრული რეაბილიტაცია, რადგან ბევრად ძლიერი დაგიბრუნდეთ.

წინ დიდი გზა გვაქვს. პროფესიონალური კარიერა და 2028 წლის ოლიმპიური თამაშები“ – წერს ლაშა გურული სოციალურ ქსელში.