დელტა თითქმის გავარდნილია, ფლეი ოფი ჯერ შეუვსებელი

დასრულდა სუპერლიგის მე-17 ტური, რომელმაც ცხრილის ქვედა ნაწილში ბევრი რამ გაარკვია. თითქმის გადაწყვეტილია, რომ ელიტას, მე-11 ადგილზე გასული გურჯაანის დელტა დატოვებს, ხოლო ბოლოსწინა, მე-10 ადგილზე გასულ გუნდს ლიგაში დასარჩენად შანსი ექნება, რადგან ა ლიგის ფინალისტთან საკვალიფიკაციო სერიის თამაში მოუწევს.

დელტამ, გურჯაანში უშანსოდ წააგო გათამაშების ლიდერ თსუ-სთან – 71:92, ხოლო ბოლოსწინა ადგილზე მყოფმა რაშმა თბილისში გორის ივერიონს 98:91 სძლია და ცხრილში ასეთი ვითარება მივიღეთ: რაშს და გურჯაანის დელტას 17-17 მატჩი აქვთ ჩატარებული, მაგრამ რაშს სამით მეტი გამარჯვება აქვს. ორივე გუნდს ჩასატარებელი დარჩა 3-3 მატჩი და ისე უნდა მოხდეს, რომ რაშმა ყველა წააგოს, დელტამ კი, ყველა მოიგოს. ამასთან, მხოლოდ ეს არ კმარა: გუნდები ერთმანეთს 5 აპრილს ხვდებიან და გურჯაანელებმა 16 ქულაზე მეტით უნდა მოიგონ, რადგან სწორედ ამდენით აქვთ რაშთან პირველ წრეში წაგებული.

რაც შეეხება ასევე ექვსი თამაშის მომგებ რუსთავთან, დელტას გადასწრების შანსი აღარ აქვს, რადგან ურთიერთშეხვედრები წაგებული აქვს და ქულებით რომ აჯობოს, დარჩენილ მატჩებში ეს თეორიულადაც ვერ მოხერხდება. ასე და ამგვარად, გურჯაანის დელტას სუპერლიგაში დარჩენის მხოლოდ თეორიული შანსი აქვს. სამაგიეროდ, გამძაფრდა ბრძოლა ბოლოსწინა ადგილის თავიდან ასაცილებლად. რაშმა მეორე წრეში გამართული შვიდი მატჩიდან ხუთი მოიგო და სუპერლიგაში დარჩენის რუსთაველებზე არანაკლები შანსი აქვთ.

ამ ეტაპზე ორივე გუნდს 6-6 მოგება აქვს მოპოვებული, თუმცა  ურთიერთშეხვედრებში რაში რუსთავს ჯობნის. რუსთავს ოთხი მატჩი დარჩა, რაშს – სამი.

თუმცა, დღევანდელი წაგების შემდეგ, ვერც ივერიონი იქნება მშვიდად. დაკარგული ქულებით ივერიონი და რუსთავი თანაბრად არიან და ვინ შევა ფლეი ოფში, დარჩენილი ტურები გადაწყვეტს.