ივნისამდე ბორტოლამი, ივნისიდან ბრონკანი

ფრანგული მედია დარწმუნებით წერს, რომ საქართველოს რაგბის ნაკრების მთავარი მწვრთნელი 51 წლის ფრანგი სპეციალისტი პიერ-ანრი ბრონკანი გახდება. თუმცა, ეს მხოლოდ ივნისში მოხდება, რადგან ბრონკანს სარაგბო კლუბ ბრივთან კონტრაქტი სწორედ ივნისამდე აქვს. ფრანგები იმასაც წერენ, რომ ბრონკანსა და ბორჯღალოსნებს შორის ორწლიანი კონტრაქტი გაფორმდება.

რა იქნება მანამდე? ამ დროისთვის შავ ლომთან იტალიელი სპეციალისტი მარკო ბორტოლამი მუშაობს. იტალიელი იმუშავებს საქართველოს ნაკრებთან ერთად ერთა თასზეც, ხოლო ივნისიდან ბრონკანის ასისტენტად დარჩება.

შეგახსენებთ, ბრონკანის გარდა, საქართველოს ნაკრების მწვრთნელად ასევე ფრანგი ფრან აზემასა და ახალ ზელანდიელი უორენ გეტლანდი განიხილებოდა. როგორც ჩანს, საქართველოს რაგბის კავშირმა შეთანხმებას და სასურველ პირობებს ბრონკანთან მიაღწია.

ბრონკანი აქამდე ძირითადად ფრანგულ კლუბებში იყო დასაქმებული, ახლა კი, ძალებს სანაკრებო დონეზეც სცდის.

ფრანგული მედია წერს, რომ ბრონკამი იმ გუნდს ჩაიბარებს, რომელიც ყოველთვის ცნობილი იყო ფიზიკური ძალით, შერკინების კულტურითა და უნიკალური ინდივიდუალურობით. ეს სწორედ ის თვისებებია, რომლებიც ფრანგი მწვრთნელის მიდგომებს იდეალურად შეესაბამება, საქართველო კი, ეცდება, მისი გამოცდილება გამოიყენოს და დაამტკიცოს, რომ გრანდებისთვის წინააღმდეგობის გაწევა შეუძლია.

ბორტოლამი ფრანგის სამწვრთნელო შტაბში ფორვარდების მწვრთნელად მოიაზრება, მაგრამ ზაფხულამდე საქართველოს ნაკრების დროებითი თავკაცის მოვალეობას შეასრულებს.

ბრონკანის ოცწლიანი სამწვრთნელო კარიერაში იყო ფრანგული კლუბები: ბლანიაკი, ოში, ორიაკი, კოლომიე, ტარბი, ტულუზა, კასტრი და ბრივი. ნაკრებში კი ერთადერთხელ უმუშავია – 2023 წელს ავსტრალიის ეროვნული გუნდის მწვრთნელის ასისტენტი იყო.