კვარა ფრანგული ტიტულების შეგროვებას აგრძელებს

ხვიჩა კვარაცხელიამ 2026 წელი ტიტულით გახსნა. პარის სენ-ჟერმენმა სუპერთასისთვის ბრძოლაში მარსელი პენალტების სერიაში დაამარცხა.

ეს კვარას მეექვსე ტიტულია პარიზულ გუნდში მისვლის შემდეგ. 2025 წელს პსჟ-ს მოგებული ექვსი ტიტულიდან ხვიჩას სწორედ სუპერთასი აკლდა, რადგან ნაპოლიდან მაშინ გადავიდა, როდესაც ფრანგულ გუნდს ეს საქმე მოეული ჰქონდა. თუმცა, ხვიჩამ ეს დანაკლისი წელს აინაზღაურა.

პარისელები პირველ ტაიმში პსჟ უსმან დემბელეს გოლით დაწინაურდნენ. აქ ვიტინიას ჩინებული პასიც გამოსარჩევია და გოლის ავტორის საბოლოო შესრულებაც.

მეორე ტაიმში სიტუაცია შეიცვალა. უფრო სწორად, ხვიჩას გასვლის შემდეგ შეიცვალა. ჩვენებურმა მოედანზე 72 წუთი დაჰყო, მარსელმა კი 76-ე წუთზე მეისონ გრინვუდის პენალტით გაათანაბრა; დე ძერბის შეგირდები 87-ე წუთზე სულაც წინ გავიდნენ – ვილიამ პაჩომ ბურთი საკუთარ კარში ჩაჭრა.

მატჩის ბედის გადაწყვეტა 94-ე წუთზე ობამეიანგს შეეძლო, მაგრამ კარგი მომენტი გაანიავა, ხოლო კონტრშეტევაზე პაჩო-ვიტინია-ბარკოლა-დუეს მშვენიერი გათამაშება და 2:2.

სუპერთასის ბედი პენალტებში გადაწყდა: პსჟ-მ ოთხიდან ოთხი პენალტი გაიტანა, ხოლო მარსელმა ერთი და 4:1.

არასრულ ერთ წელში კვარას ფრანგული ტირულების სია ასეთია: საფრანგეთის ჩემპიონატი, საფრანგეთის სუპერთასი, საფრანგეთის თასი, ჩემპიონთა ლიგა, ევროპის სუპერთასი და საკონტინენტთაშორისო თასი.