მამუკელაშვილი: ევროპაში დაბრუნებაზეც კი ვფიქრობდი

სანდრო მამუკელაშვილმა NBA-ში თავისი გუნდი იპოვა. ტორონტო რეპტორსი ოთხწლიან ლოდინად ღირდა. ჩვენებურს ახლა მართლაც საუკეთესო პერიოდი უდგას.

არადა, ჯერ კიდევ ზაფხულში, თვალი ევროპისკენ ეჭირა და მოლაპარაკებებიც დაწყებული იყო. ამის შესახებ მამუკელაშვილმა კანადურ მედიასთან საუბარში განაცხადა.

„დასამალი არაფერია. იყო პერიოდი, როდესაც NBA-ში საქმეები არცთუ კარგად მიმდიოდა და ევროპაში დაბრუნებაზე ვფიქრობდი. მონაკოსთან მოლაპარაკებებიც კი მქონდა. ვფიქრობდი, რომ ამერიკაში ყველაფერი დასრულდა. მგონი, ჩემი მესამე სეზონი იყო, როდესაც მატჩების განაცხადში მოხვედრაც კი მიჭირდა, თუმცა, სწორედ მაშინ ვუთხარი საკუთარ თავს – ამას არ გავაკეთებ…

ჩემი საქმე კალათბურთია, ნებისმიერი კალათბურთელის მიზანი კი, სწორედ NBA-ში თამაშია. ამ დროის განმავლობაში ვისწავლე, კალათბურთის ერთგულად დავრჩენილიყავი. თუ მაგრად მუშაობ და ცდილობ თანაგუნდელებს მაქსიმალური მხარდაჭერა გაუწიო, ბოლო-ბოლო ლიგაში საკუთარ თავსაც იპოვი, შანსიც აუცილებლად მოვა…

ახლა, ეს პერიოდია. ძალიან მადლიერი ვარ ტორონტოს მწვრთნელების, რომლებიც მაქსიმალურ თავისუფლებას მაძლევენ. მეუბნებიან, გავიდე მოედანზე და ვითამაშო. ვაკეთო ის, რაც სინამდვილეში შემიძლია. ეს თავდაჯერებულობას მმატებს, ვგრძნობ, რომ შანსი მაქვს, გუნდს კიდევ უფრო მეტი რამ მივცე…

ბევრი ვიშრომე, რომ ახლა აქ ვყოფილიყავი. ვცდილობ, ყოველი წუთი, რომელსაც მოედანზე ვატარებ, მაქსიმალურად სარგებლიანად გამოვიყენო. წინ კიდევ ბევრი საქმეა, მთავარი კი ისაა, რომ რაც არ უნდა რთულ ვითარებაში იყო, თავი არ უნდა დახარო“, – ამბობს სანდრო.

მიმდინარე სეზონში სანდროს საშუალო მაჩვენებელი ასეთია: 9.7 ქულა, 4.3 მოხსნა, 1.7 პასი.