საქართველო ნაკრები ესპანეთში გაემგზავრა, სადაც 15 მარტს რაგბი ევროპის ჩემპიონატის ფინალურ მატჩში პორტუგალიის ნაკრებს ეთამაშება.
ესპანეთში გამგზავრებამდე საქართველოს ნაკრების მთავარი მწვრთნელის მოვალეობის შემსრულებელმა, მარკო ბარტოლამმა და ლუკა მატკავამ კომენტარები გააკეთეს.
მარკო ბარტოლამი:
„რუმინეთთან მძიმე თამაშის შემდეგ ძალების აღდგენა მოვახერხეთ და ვფიქრობ, ფინალისთვის მზად ვიქნებით. გადამწყვეტი მატჩი ესპანეთში იმართება, ჩვენთვის ეს გასვლითი თამაშია, მეტოქე კი, თითქმის შინაურ გარემოში იქნება და მხარდაჭერაც ექნებათ.
პორტუგალია ძლიერი მეტოქე და საშიში გუნდია, მათი უკანახაზელები სწრაფად გადაადგილდებიან. ამიტომ მნიშვნელოვანია, რომ ჩვენი უკანახაზელები ყურადღებით იყვნენ და საფრთხეები სწორად შეაფასონ. დაძაბულ და საინტერესო თამაშს ველოდები, ვთვლი, რომ ჩვენი გუნდი სათანადოდ მზად არის ამ თამაშის მოსაგებად“.
ლუკა მატკავა:
„მოსამზადებელმა ეტაპმა კარგად ჩაიარა. დაგვრჩა ფინალური, კაპიტნის ვარჯიში. პორტუგალია ძლიერი გუნდია, ჯგუფურ ეტაპზე კარგი თამაშები აჩვენა და რთული ოპონენტი იქნება, მით უმეტეს, რომ ფინალი ესპანეთში იმართება. თუმცა ჩვენ მზად ვართ და ვეცდებით, რომ დამაჯერებლად მოვიგოთ“.
ცნობილია საქართველოს ნაკრების შემადგენლობა პორტუგალიასთან მატჩისთვის
ხაზი: ოთარ მეტრეველი, აკაკი ტაბუცაძე, გიორგი შველიძე, გიორგი კვესელაძე, დავით ნინიაშვილი, თედო აბჟანდაძე, ვასილ ლობჟანიძე;
შერკინება: გიორგი ახალაძე, ვანო კარკაძე, გიორგი მელიქიძე, მიხეილ ბაბუნაშვილი, ლადო ჩაჩანიძე, ილია სპანდერაშვილი, ბექა საღინაძე, თორნიკე ჯალაღონია;
მარქაფა: ნიკოლოზ სუთიძე, მამუკა მსტოიანი, ალექსანდრე ქუნთელია, გიორგი ჯავახია, ლუკა ივანიშვილი, ბექა გორგაძე; მიხეილ ალანია, ლუკა მატკავა.
