ორბმა ჩემპიონი დაამარცხა და ბრინჯაო ირგუნა

საქართველოს საკალათბურთო სუპერლიგის მიმდინარე გათამაშებას პირველი პრიზიორი ჰყავს. ტყიბულის ორბმა ისტორიული ბრინჯაოს მედალი მოიგო.

ქუთაისი-ორბი 80:86

(25:28; 21:15; 16:19; 18:24)

ირაკლი ტომარაძის გაწვრთნილმა გუნდმა მესამე ადგილისთვის მატჩში გასული სეზონის ჩემპიონი და მასპინძელი ქუთაისი 86:80 დაამარცხა და არსებობის ისტორიაში პირველად, სუპერლიგის საპრიზო ადგილი დაიკავა.

შეხვედრა თავიდანვე გარდამავალი უპირატესობით წარიმართა. პირველი მეოთხედი ტყიბულელთა მცირე უპირატესობით დაიწყო და მათივე გამარჯვებით დასრულდა; მეორე პერიოდში ინიციატივას უკვე იმერული კლუბი დაეუფლა – კოტე ტუღუშის შეგირდებმა მეოთხედი მოიგეს და დიდ შესვენებაზე სამქულიანი ლიდერობით გავიდნენ – 46:43; მესამე პერიოდში ორბმა დაცვა გააძლიერა, შეტევას მოუმატა და გადამწყვეტი ათწუთეულის წინ ანგარიში გაათანაბრა – 62:62; გადამწყვეტი გამოდგა ბოლო პერიოდი, რომელიც ორბმა მოიგო და მედლებიც ირგუნა.

ორბის შემადგენლობაში საუკეთესო იყო ილია ლონდარიძე, რომელმაც გუნდს 24 ქულა და 6 მოხსნა შესძინა; შედეგიანი იყო შონ მურიც, ვინაც 15 ქულასთან ერთად 9 მოხსნა, 4 ჩაჭრა და 3 პასი მიითვალა; ქუთაისის მხრიდან მოედანზე შეუდარებელი იყო ტაირი ბოიკინმა – 38 ქულა და 5 პასი, მაგრამ მისი ეს სუპერ-თამაში გუნდის გამარჯვებისთვის საკმარისი არ აღმოჩნდა.

მატჩის შემდეგ ორბის გუნდის წევრები ბრინჯაოს მედლებითა და შესაბამისი სიგელით დააჯილდოვა კალათბურთის ფედერაციის საშეჯიბრო დეპარტამენტის ხელმძღვანელმა, კობა კობიაშვილმა.