რამაზ სვანაძე – მეტი აგრესია და სისწრაფე გვაკლდა

ევროპის ახალგაზრდულ ჩემპიონატამდე, რომელიც სლოვაკეთში გაიმართება თითზე ჩამოსათვლელი დღეებიღა დარჩა. საქართველოს 21 წლამდე ნაკრებმა, რომელიც ავსტრიაში დასკვნით მოსამზადებელ შეკრებას გადის რუმინელ თანატოლებთან ამხანაგური მატჩი გამართა და სამწუხაროდ 0:1 დამარცხდა.

ცხადია, მკითხველისთვის საინტერესო უნდა იყოს თუ რა კომენტარი გააკეთა ჩვენი გუნდის დამრიგებელმა რამაზ სვანაძემ:

„დავმარცდით და ბუნებრივია კმაყოფილები ვერ ვიქნებით. საკმაოდ მძიმე მატჩი გამოვიდა. ჩვენთვის მნიშვნელოვანი იყო, რომ ყველა ფეხბურთელი გვენახა საქმეში და ტრავმებიც მაქსიმალურად აგვერიდებინა თავიდან.

არაერთი ფეხბურთელისთვის დიდი ხნის პაუზის შემდეგ ეს პირველი თამაში იყო. ბევრისთვის სეზონი 3 კვირის წინ დასრულდა და ალბათ ამით იყო განპირობებული მათი მოქმედებები მოედანზე. მეტი აგრესია და სისწრაფე გვაკლდა, რითიც ყოველთვის გამოვირჩეოდით.

ევროპის ჩემპიონატამდე დიდი დრო აღარ დარჩა და მჯერა იმ მატჩებში გაცილებით სხვა ფეხბურთს ვაჩვენებთ, ვიდრე ეს დღეს იყო. საერთო ჯამში რუმინეთთან კარგი სპარინგი გამოვიდა.

დაცვით ფაზაში აუცილებლად დაგვჭირდება გადაწყობა, რადგან ბოლო მომენტში რამდენიმე ფეხბურთელი გამოგვაკლდა. ეს მარტივი არ იქნება, დროც ცოტაა, მაგრამ უნდა შევძლოთ. 11 ივნისს, პოლონეთთან პირველ მატჩს სრულ მზადყოფნაში უნდა შევხვდეთ“ – აღნიშნა რამაზ სვანაძემ.