25 წლის ქართველი მეკარე გიორგი მამარდაშვილი პოლიციამ მაშინ გააჩერა, როდესაც საკუთარი Audi-ით M6 ავტომაგისტრალზე მოძრაობდა და ტელეფონი საჭის შუა ნაწილთან ეჭირა.
ლივერპულის ფეხბურთელი მანქანის მართვისას მობილურის გამოყენებისთვის 440 გირვანქა სტერლინგით დააჯარიმეს. მასვე მართვის მოწმობაზე ექვსი საჯარიმო ქულა დაემატა, პლუს 120 გირვანქა სასამართლო ხარჯი დაეკისრა, ხოლო 176 გირვანქას დაზარალებულთა ფონდში გადაიხდის.
მამარდაშვილი პოლიციამ 27 იანვარს, დაახლოებით 15:45 საათზე, უორინგტონთან ახლოს, M6 ავტომაგისტრალის სამხრეთის მიმართულების გზაზე გააჩერა. უორინგტონის გაერთიანებულ სასამართლოში განაცხადეს, რომ პოლიციამ ფეხბურთელი მას შემდეგ შეაჩერა, რაც ერთ-ერთმა ოფიცერმა დაინახა, როგორ უყურებდა მობილურ მოწყობილობას ავტომაგისტრალზე მოძრაობისას.
ჩეშირის პოლიციის ოფიცერმა სასამართლოსთვის მიცემულ ჩვენებაში თქვა, რომ შენიშნა შავი აუდი, რომელიც თავისუფალ ზოლში არ გადადიოდა, რამაც პოლიციელის ყურადღება მიიპყრო.
პოლიციის ოფიცრის ჩვენება:
„როდესაც მანქანას გავუსწარი, დავინახე, რომ მძღოლს მობილური ტელეფონი ხელში ეჭირა და საჭის შუა ნაწილთან ჰქონდა დაჭერილი. ჩანდა, ეკრანზე რაღაცას უყურებდა მაშინ, როდესაც ავტომაგისტრალის სიჩქარით მოძრაობდა.
როცა ამის გაკეთება უსაფრთხო გახდა, მანქანა ავარიულ ზოლში გავაჩერე. შემდეგ გადავედი მძღოლთან სასაუბროდ, რომელიც მანქანაში მარტო იყო და ვთხოვე, ჩემს საპოლიციო მანქანაში, უკანა სავარძელზე დამჯდარიყო“.
სასამართლოზე ითქვა, რომ მამარდაშვილს ქართული მართვის მოწმობა წარადგინა და არ დაუმალავს ვინაობა. თუმცა, არ უპასუხა პოლიციის ბრალდების შესახებ შეტყობინებას და მისი საქმე ერთიანი მართლმსაჯულების პროცედურის დახურულ სხდომაზე განიხილეს.
დანაშაულის აღიარება არ მომხდარა. მამარდაშვილი დამნაშავედ ცნეს პოლიციის წერილობითი მტკიცებულებების საფუძველზე.
