დავითაშვილი თურქულ გრანდს სურს

ევროპაში სატრანსფერო ფანჯრის დასრულებამდე სულ რამდენიმე კვირაა დარჩენილი და სწორედ ამ პერიოდში ყველაზე ხმაურიანი ტრანსფერებია მოსალოდნელი. ერთ-ერთი მათგანი შესაძლოა ზურიკო დავითაშვილი აღმოჩნდეს, რომელიც სენტ-ეტიენის დატოვებას აქტიურად ცდილობს.

24 წლის ქართველს თურქული გრანდი ბეშიქთაში საკმაოდ სერიოზულად აკვირდება. სტამბოლელებმა მის მიმართ ინტერესი ჯერ კიდევ ზაფხულის დასაწყისში დააფიქსირეს და ახლა, ოლე გუნერ სულშერის ხელმძღვანელობით, მარცხენა ფლანგის გაძლიერებისთვის დავითაშვილი ერთ-ერთ მთავარ ვარიანტად ითვლება.

კლუბის კანდიდატთა სიაში სამი ფეხბურთელია: დავითაშვილი (სენტ-ეტიენი), ჯეიდონ სანჩო (მანჩესტერ იუნაიტედი) და არმან ლორიენტე (სასუოლო). სანჩოს იტალიურ რომაში გადასვლა საბოლოოდ ჩაიშალა, რის შემდეგაც მისი ბეშიქთაშში ტრანსფერის შესაძლებლობა კვლავ დღის წესრიგში დაბრუნდა.

თურქული კლუბი უახლოეს დღეებში მიიღებს გადაწყვეტილებას, ვინ შეავსებს მარცხენა ფლანგს. თუ არჩევანი ქართველზე გაკეთდა, მისი ტრანსფერი შესაძლოა სწრაფად და ეფექტურად განხორციელდეს.

ამ დროისთვის დავითაშვილი მოლოდინის რეჟიმშია, თუმცა მასზე არა მხოლოდ ბეშიქთაში, არამედ სხვა ევროპული და თურქული კლუბებიც სერიოზულ ინტერესს ინარჩუნებენ.