დიდი დარტყმა ჩვენს მეტოქეს – ბოსნიას ლიდერი გამოაკლდა

ევრობასკეტზე საქართველოს ეროვნულ ნაკრებს საკმაოდ რთულ ჯგუფში მოუწევს კონკურენცია, ერთ-ერთი მეტოქე, ვის დამარცხებაზეც შეიძლება იმედები დავამყაროთ, ბოსნია-ჰერცოგოვინაა.

როგორც მოგეხსენებათ, თითოეულ გუნდს შემადგენლობაში ერთი ნატურალიზირებული კალათბურთელის ყოლის უფლება აქვს. ბოსნიელებს კი სურდათ, რომ NBA-ს ცენტრისთვის, ლუკა გარზასთვის, ეს სტატუსი მოეხსნათ და ევრობასკეტზე დაემატებინათ.

ბოსნიის კალათბურთის ფედერაცია აქტიურად მუშაობდა, რომ წარმოშობით ბოსნიელი გარზასთვის ნატურალიზირებული კალათბურთელის სტატუსი მოეხსნათ. მიუხედავად იმისა, რომ გარზას დედა ბოსნიელია, ის მაინც ნატურალიზირებულ კალათბურთელად ითვლებოდა, ფედერაციას კი ამ სტატუსის მოხსნა სურდა, თუმცა ამაოდ.

26 წლის ლუკა გარზა აქამდე მინესოტა ტიმბერვულვზის ღირსებას იცავდა, ხოლო ცოტა ხნის წინ ბოსტონ სელტიქსთან გააფორმა კონტრაქტი. მიუხედავად ამისა, ბოსნიამ ნატურალიზირებულ კალათბურთელებს შორის არჩევანი უნიკახას უკანახაზელ ქსავიერ კასტანედაზე გააკეთა, რადგან შემადგენლობაში უკანახაზელის პრობლემა უფრო აქვთ.

რაც შეეხება ცენტრს, ამ პოზიციაზე გუნდს გამოცდილი იუსუფ ნურკიჩი ჰყავს. სავარაუდოა, რომ გადაწყვეტილების მიღების პროცესში გარზასა და კასტენადას შორის დიდი გავლენა სწორედ ამ ფაქტორმა მოახდინა.