საქართველომ შვეიცარია დაამარცხა და შანსი დაიტოვა

საქართველოს 20 წლამდე კალათბურთელთა ნაკრებმა ევროპის ჩემპიონატის ბ დივიზიონის ჯგუფური ეტაპის მეორე მატჩში შვეიცარია დაამარცხა და ჯგუფიდან გასვლის შანსი დაიტოვა.

კოტე ტუღუშის გაწვრთნილმა გუნდმა პირველ ტურში ავსტრიასთან (78:89) წააგო და ფლეი ოფში გასვლას ჩრდილი მიადგა, მაგრამ მეორე ტურში მდგომარეობა გაიუმჯობესა.

შვეიცარიას პირველ ტურში დანია ჰყავდა დამარცხებული, შესაბამისად, ურიგო ოპონენტი არ გახლდათ, თუმცა ქართველებმა მოინდომეს და მეტოქე ისე დაამარცხეს, შანსი არ მიუციათ – 96:81.

ქართველებმა პირველი, მეორე და მესამე პერიოდები მოიგეს. საქართველოს ლიდერობამ ბოლო ათწუთეულის წინ მთლიანობაში 25 ქულა შეადგინა, რაც გამარჯვებას ნიშნავდა. ბოლო პერიოდში შვეიცარიელებმა მხოლოდ ჩამორჩენა შეამცირეს.

თენგო გოგიშვილმა 23 ქულა, 5 მოხსნა და 4 პასი მიითვალა. ორმაგი დუბლი გაიფორმა ალექსანდრე დაუშვილმა, რომელმაც 22 ქულა და 10 მოხსნა მიითვალა. ავთანდილ ბახტაძის ანგარიშზე 20 ქულა, 7 მოხსნა და 4 პასი დაგროვდა.