მანჩესტერმა სეზონის პირველი გამარჯვება მოიპოვა

პრემიერ ლიგის მესამე ტურში, რუბენ ამორიმის მანჩესტერ იუნაიტედმა საკუთარ მოედანზე ჩემპიონატში ახლად აღზევებული ბარნლი მიიღო. პორტუგალიელ სპეციალისტს, სეზონის კატასტროფული სტარტის შემდგომ გამარჯვება ესაჭიროებოდა…

შეხვედრა მანჩესტერელების უპირატესობით დაიწყო და 27-ე წუთზე, ჯოშ ქალენის ავტო გოლით ანგარიშზე აისახა. “წითელმა ეშმაკებმა” ერთ-ბურთიანი უპირატესობა ტაიმის ბოლომდე შეინარჩუნეს, თუმცა ამავდროულად ბევრი მომენტი ხელიდან გაუშვეს.

მეორე ნახევრის დაწყებიდან მალევე ბარნლიმ, ლაილ ფოსტერის გოლით ანგარიში გაათანაბრა. თუმცა ფრე დიდხანს არ შენარჩნებულა — ფოსტერის გოლიდან ორ წუთში იუნაიტედი, ბრაიან მბეუმოს გოლით კვლავ წინ გავიდა.

67-ე წუთზე, მანჩესტერის დაცვის ხაზის სერიოზული შეცდომებით ჯეიდონ ენტონიმ ისარგებლა და გოლი გაიტანა. გუნდის პოტუგალიელ თავკაცს იმედები ეწურებოდა, როდესაც მეშვიდე დამატებულ წუთზე ამად დიალომ თერთმეტმეტრიანი მოიპოვა. ამჯერად, ბრუნო ფერნანდეშმა პენალტი უშეცდომო შეასრულა და გუნდს სეზონის პირველი გამარჯვება მოუტანა.

ამორიმის გუნდი 4 ქულით მეცხრე ადგილზეა და სანაკრებო პაუზის შემდეგ, მეოთხე ტურში მანჩესტერ სიტის დაუპირისპირდება.