ქოჩორაშვილის პირველი ნაბიჯები სპორტინგში

სეზონის დაწყებამდე ლისაბონის სპორტინგმა პირველი ამხანაგური მატჩი ჩაატარა და შოტლანდიური სელტიკის წინააღმდეგ 0:2 დამარცხდა. მიუხედავად უარყოფითი შედეგისა, შეხვედრა განსაკუთრებით საინტერესო ქართველი გულშემატკივრისთვის იყო – კლუბში გიორგი ქოჩორაშვილის დებიუტი შედგა.

24 წლის ქართველი ნახევარმცველი მოედანზე მეორე ტაიმში, 59-ე წუთზე გამოჩნდა. ქოჩორაშვილი აქტიურად ჩაერთო თამაშში, იბრძოდა, ცდილობდა ბურთის განაწილებას და რამდენჯერმე სახიფათო კომბინაციების შექმნაც სცადა.

თუმცა იყო პრობლემაც, ერთ-ერთი ეპიზოდისას, როდესაც სპორტინგი შეტევაში იმყოფებოდა, ქოჩორაშვილმა ბურთი დაკარგა, რაც საბოლოოდ მეტოქის მეორე გოლით დასრულდა. ეს მომენტი ახალგაზრდა ფეხბურთელის დებიუტზე გარკვეულად ნეგატიურ ჩრდილს აყენებს, თუმცა მთლიანობაში გიორგი მოედანზე თავდადებით გამოიყურებოდა.

მატჩის მიწურულს ქოჩორაშვილმა შესანიშნავი პასით თანაგუნდელი მეკარესთან პირისპირ დატოვა, თუმცა დარტყმა არაზუსტი გამოდგა და სპორტინგმა საპასუხო გოლის გატანის შანსი გაუშვა ხელიდან.

გიორგიმ პორტუგალიურ გრანდთან კონტრაქტი სულ ცოტა ხნის წინ გააფორმა – შეთანხმება 2030 წლამდეა გათვლილი. კლუბის შიგნითაც და გულშემატკივრებშიც მის მიმართ მოლოდინი საკმაოდ მაღალია.