ცნობილია, დარჩება თუ არა მესი ინტერ მაიამიში

ლიონელ მესის კარიერა დიდი ალბათობით კვლავ ინტერ მაიამის მაისურით გაგრძელდება. არგენტინელმა სუპერვარსკვლავმა კლუბთან დარჩენაზე პრინციპული თანხმობა უკვე გასცა და მხარეები ახლა კონტრაქტის განახლების ტექნიკურ დეტალებზე მუშაობენ.

მართალია, მოქმედი ხელშეკრულება 2025 წლის ბოლომდეა ძალაში, მაგრამ მხარეებს მისი გაგრძელების სრულყოფილი შესაძლებლობა აქვთ და არსებული ინფორმაციით, ახალი ხელშეკრულება სულ მცირე კიდევ ერთი წლით გახანგრძლივდება.

მესის მთავარი მიზანი ამ ეტაპზე ამერიკულ გრანდთან ერთად MLS-ის ჩემპიონობაა. მსოფლიო საკლუბო ჩემპიონატიდან გამოთიშვის შემდეგ, არგენტინელმა ყურადღება სრულად ლიგაზე გადაიტანა. ინტერს აღმოსავლეთ კონფერენციაში ჯერჯერობით მეექვსე პოზიცია უკავია, თუმცა ჩამორჩენა აღმოსაფხვრელია.

მესისთვის ინტერ მაიამიში დარჩენა ასევე იდეალურ შესაძლებლობას წარმოადგენს, რომ 2026 წლის მსოფლიო ჩემპიონატს სათანადოდ მოემზადოს. წარსულში ვრცელდებოდა ცნობები, რომ მესი ევროპაში დაბრუნებაზე ფიქრობდა და ტოპ ჩემპიონატში კიდევ ერთი სეზონის გატარება სურდა, მაგრამ ამ ეტაპზე მისი ფოკუსი სწორედ ამერიკულ პროექტზეა მიმართული.