ხვიჩა კვარაცხელია: გამარჯვების გზაზე უნდა დავბრუნდეთ

მსოფლიოს ჩემპიონატის შესარჩევ ეტაპზე საქართველოს ნაკრებმა ზედიზედ ორი მარცხი განიცადა. ვილი სანიოლის გუნდი ჯერ ესპანეთში (0:2) დამარცხდა, შემდეგ – თურქეთში (1:4).

წაგებული მატჩების შემდეგ ხვიჩა კვარაცხელიამ სოციალურ ქსელში წერილი გამოაქვეყნა:

„პირველ რიგში მინდა მადლობა ვუთხრა ამ ორივე გასვლით მატჩზე ჩამოსულ თითოეულ გულშემატკივარს და, ყველას, ვინც გვქომაგობდა. რთული მატჩები გამოვიდა, არასასურველი შედეგებით და სათამაშო ხარისხით. აუცილებელია ყველა პრობლემა გავაანალიზოთ, დავინახოთ, მივიღოთ და შემდეგ თამაშებში გამოვასწოროთ. არ არის პირველი, როდესაც დაბრკოლებების წინაშე ვართ, მაგრამ ერთად აუცილებლად უნდა გადავლახოთ და დავბრუნდეთ გამარჯვებების და პროგრესის გზაზე“, – წერს კვარაცხელია.

შეგახსენებთ, საქართველოს ნაკრებს ჯგუფში კიდევ ორი მატჩი დარჩა ჩასატარებელი: 15 ნოემბერს შინ ესპანეთთან და 18 ნოემბერს სტუმრად ბულგარეთთან.