ავთანდილ ასათიანი: მეამაყება, რომ ქართველი ვარ

საქართველოს ფუტსალის ეროვნული ნაკრები ევროპის ჩემპიონატის ფინალურ ეტაპზე გავიდა. ავთანდილ ასათიანის გუნდმა სლოვაკეთის ნაკრებთან თბილისში მოპოვებული უპირატესობა შეინარჩუნა და ზედიზედ მეორე ითამაშებს ევროპის მთავარ სანაკრებო ტურნირზე.

მატჩის დასრულების შემდეგ კომენტარი თავად მთავარმა მწვრთნელმა გააკეთა:

„მადლობა ბიჭებს ამ საოცარი ბრძოლისთვის. აშკარად ჩანდა, რომ მოედანზე ქართველები იყვნენ. ბოლო ინტერვიუში ვახსენე, ღომ თითოეული მილიმეტრისთვის თუ არ ვიბრძოლებდით, ევროპის ჩემპიონატის საგზურს ვერ მოვიპოვებდით. იყო შეცდომები, რომელზეც ახლა არ ღირს საუბარი, მთავარია, ჩვენი მიზანი შევასრულეთ. მადლობა ფეხბურთის ფედერაციას, რომ ჩემს ფეხბურთელებს ყველა პირობა ჰქონდათ შექმნილი, რათა მხოლოდ თამაშზე ეფიქრათ. დრაჰოვკიმ (თბილისში არ უთამაშია) ძალიან შეცვალა სლოვაკების თამაში. ბოლოში ძალიან გაგვიჭირდა, მაგრამ ჩვენი ჟინით მაინც მოვახერხეთ გამარჯვება. მინდა მთელ საქართველოს, ფუტსალის ქომაგებს მივულოცო და არ მინდა გამომრჩეს ის ადამიანები, ვინც თბილისურ მატჩს დაესწრო. მათი წვლილიც ძალიან დიდია. ანალიზისთვის მოგვიანებით მოვიცლით და ევროპის ჩემპიონატისთვის მოვემზადებით. რაც მთავარია, წინ უნდა ვიყუროთ. ამ ბიჭებმა დაატკიცეს, რომ საქართველოში ფუტსალი არსებობს და არამარტო ბედნიერი ვარ, არამედ ამაყიც, რომ ქართველი ვარ“, – განაცხადა ასათიანმა.

ფუტსალის ევროპის ჩემპიონატი 2026 წლის 21 იანვრიდან 7 თებერვლის ჩათვლით სლოვენიაში, ლატვიასა და ლიეტუვაში გაიმართება. ჯგუფური ეტაპის წილისყრა 24 ოქტომბერს შედგება.

შეგახსენებთ, საქართველოს ფუტსალის ნაკრების დებიუტი ევროპის ჩემპიონატზე 2022 წელს შედგა, სადაც ჩვენმა გუნდმა ჯგუფური ეტაპი წარმატებით გადალახა და ევროპის რვა საუკეთესო ნაკრებს შორის მოხვდა.