ახალგაზრდულმა ნაკრებმა მალტა გაანადგურა 

საქართველოს 21-წლამდელთა ნაკრებმა ევროპის 2027 წლის ჩემპიონატის შესარჩევი ეტაპის მესამე ტურში უხვგოლიანი გამარჯვება მოიპოვა..რამაზ სვანაძის გუნდმა სტუმრად მალტა 5:0 დაამარცხა.

პირველი ტაიმი სრულიად ქართველთა უპირატესობით წარიმართა. საბა ხარებაშვილმა საწყის ნახევარში ორჯერ შექმნა რეალური საგოლე მომენტი, ჯერ მისი დარტყმული ბურთი ძელს მოხვდა, შემდეგ კი მეკარის შეცდომით ისარგებლა და ანგარიში გახსნა. ტაიმის მიწურულს ნიკოლოზ დადიანმა შორიდან ულამაზესი დარტყმით სხვაობა ორამდე გაზარდა.

მეორე ნახევარში სტუმრები კვლავ დომინირებდნენ. 68-ე წუთზე გიორგი ტაბატაძემ ზუსტი დარტყმით ბურთი ბადეში მოათავსა და ანგარიში 3:0 გახდა. დარჩენილ დროში კიდევ ორი გოლი გავიდა: ნარიმანიძემ თავური დარტყმით გაიტანა, ხოლო შეცვლაზე შესულმა ბასილაძემ საბოლოო წერტილი დასვა — 5:0.

ამ გამარჯვებით საქართველოს ახალგაზრდულმა ნაკრებმა ციკლში პირველი სამი ქულა მოიპოვა და ახლა ჯგუფში მესამე პოზიციაზეა. პირველ ადგილს საბერძნეთი ინარჩუნებს ცხრა ქულით, მეორე ადგილზე გერმანიაა ექვსი ქულით.

შემდეგ მატჩებს სვანაძის გუნდი ნოემბერში გამართავს – 14-ში საბერძნეთში ითამაშებს, ხოლო 18 ნოემბერს გერმანიას თბილისში მიიღებს. ჯგუფის გამარჯვებული პირდაპირ ევროპის ჩემპიონატზე გადის, ხოლო მეორეადგილოსნები პლეი-ოფში შეეცდებიან ფინალურ ეტაპზე მოხვედრას.