დუდუ დადიანის ფინალში ვსა და ქუთაისი ითამაშებენ

დუდუ დადიანის მემორიალის ფინალში ვიქტორ სანიკიძის საკალათბურთო აკადემიის გუნდი და ქუთაისი ითამაშებენ.

ვსა-მ ნახევარფინალში ბათუმთან საკმაოდ დიდი ბრძოლა გადაიტანა და ბოლო წუთებზე – 79:76 სძლია. ბათუმელებს ბოლო წამზე გათანაბრება შეეძლოთ, თუმცა აკაკი დვალიშვილის სამქულიანი მიზანს ასცდა.

სამაგიეროდ, ოვერტაიმი დაინიშნა მეორე ნახევარფინალში. თამაში რომ დამატებით დროში გადავიდა, გვარიანი მოულოდნელობაა. იმის გამო არა, რომ ქუთაისი ზოგადად კსუ-ზე ნაკლებია. საქმე იქამდე იყო მისული, რომ კავკასიელთა გამარჯვება თითქმის გადაწყვეტილი იყო. ბოლო წუთზე კსუ 5 ქულით (88:83) იგებდა და ბურთს ფლობდა, თუმცა საქმე ისე დატრიალდა, რომ ქუთაისელებმა ანგარიში გაათანაბრეს.

რიონისპირელმა ჯავიონ ოგუნიემმა დასრულებამდე 30 წამით ადრე ორქულიანი მიითვალა, ხოლო გამთანაბრებელი სამქულიანი ზედ საფინალო სირენის წინ ჩააგდო – 88:88.

დამატებით დროში ქულა-ქულაში თამაში წავიდა, მაგრამ კსუ ლიდერობდა. კავკასიელები იგებდნენ ბოლო წამებზეც, მაგრამ გიორგი სულაბერიძემ ლუკა ალავიძის აცილებულს დაამატა და გამარჯვების ბურთი ჩააგდო და ქუთაისს ფინალის საგზური მოუტანა – 97:96.

ფინალური შეხვედრა თბილისის ოლიმპიურ სასახლეში 2 ოქტომბერს, 19:00 საათზე გაიმართება.