ინგლისმა ევროპა მეორედ მოიგო

ინგლისის ქალთა ეროვნული ნაკრები ევროპის ჩემპიონი გახდა. შვეიცარიაში გამართული ტურნირის ფინალში ინგლისელებმა ესპანეთის ნაკრები პენალტების სერიაში დაამარცხეს და ტიტული ზედიზედ მეორედ მოიპოვეს.

შეხვედრა, რომელიც ბაზელში გაიმართა, დრამატული სცენარით წარიმართა. პირველი ტაიმი ესპანეთის უპირატესობით დასრულდა. 25-ე წუთზე ანგარიში მარიონა კალდენტეიმ გახსნა. თუმცა, ესპანელებმა უპირატესობის შენარჩუნება ვერ მოახერხეს: 57-ე წუთზე ალესია რუსომ გათანაბრება შეძლო.

მატჩის ძირითადი და დამატებითი დრო ფრედ, 1:1 დასრულდა. გამარჯვებული პენალტების სერიაში გამოვლინდა, სადაც ინგლისმა 3:1 იმარჯვა.

ინგლისელებმა ხუთი თერთმეტმეტრიანიდან სამი ზუსტად დაარტყეს, ხოლო ესპანეთის ნაკრებმა მხოლოდ ერთი დარტყმის რეალიზება შეძლო. ინგლისის მეკარე ანა ჰემპტონმა ორი პენალტის მოგერიება შეძლო, კიდევ ერთი დარტყმა ესპანელებმა ზუსტად ვერ შეასრულეს.

ეს იყო ინგლისის მეორე ევროპის ჩემპიონობა. პირველი ტიტული 2022 წელს მოიგეს, ხოლო ახლა ტიტული წარმატებით დაიცვეს. სარინა ვიეგმანის გუნდმა ტურნირის რთული ბადე დაძლია: მეოთხედფინალში შვედეთის ნაკრებს სერიიდან გამოეთიშა, მიუხედავად იმისა, რომ ორი ბურთით ჩამორჩებოდა; ნახევარფინალში იტალიასთან ბოლო წამებზე გაათანაბრა და დამატებით დროში დაამარცხა მეტოქე; ფინალში კი ევროპის ახალბედა ფინალისტს, ესპანეთს სძლია.

ესპანეთის ნაკრები ისტორიაში პირველად ითამაშებდა ფინალში, თუმცა დებიუტი თასის გარეშე დასრულდა.