საქართველოს ეროვნული ნაკრები მსოფლიო ჩემპიონატის შესარჩევი ეტაპის მესამე შეხვედრას 11 ოქტომბერს, ელჩეში, ესპანეთის წინააღმდეგ გამართავს. გუნდი უკვე რამდენიმე დღეა ალიკანტეშია და ინტენსიურად ემზადება ურთულესი მატჩებისთვის.
მესამე ვარჯიშის შემდეგ ნაკრების ლიდერებმა — ხვიჩა კვარაცხელიამ, გიორგი ქოჩორაშვილმა და გიორგი მიქაუტაძემ მოახლოებულ შეხვედრებზე ისაუბრეს და გუნდის განწყობაზე შეაჩერეს ყურადღება.
ხვიჩა კვარაცხელია:
„მზადების პირობები შესანიშნავია, ყველაფერი ისეა ორგანიზებული, როგორც სერიოზულ მატჩებამდე სჭირდება გუნდს. სასიამოვნოა, რომ ამჯერად უფრო მეტი დრო გვაქვს ერთმანეთთან შეთამაშებისთვის და ფორმის დასახვეწად. თითოეულმა ფეხბურთელმა ძალიან კარგი განწყობით დაიწყო შეკრება.
მინდა კლუბს მადლობა გადავუხადო, რადგან მათ გვერდით დგომამ მომცა შესაძლებლობა, რომ ნაკრებში ასი პროცენტით ფორმაში ჩავდგე. ჩვენ ყველაფერს გავაკეთებთ წარმატებისთვის, სანამ შანსი არსებობს მსოფლიო ჩემპიონატზე გასასვლელად. ვიცით, როგორი მნიშვნელობა აქვს ამ მატჩებს ქვეყნისთვის, და ყველაფერს გავაკეთებთ, რომ შედეგი დადებითი იყოს.“
გიორგი ქოჩორაშვილი:
„ნაკრებში ყოფნა ყოველთვის განსაკუთრებული შეგრძნებაა, განსაკუთრებით მაშინ, როცა მეგობრებთან ერთად ხარ და ამავე დროს შენი ქვეყნის ღირსებას იცავ. ჩემთვის ესპანეთში თამაში ემოციურადაც მნიშვნელოვანია — აქ 8 წელი გავატარე და ეს ქვეყანა ჩემთვის ძალიან ახლოა.
ესპანეთთან უკვე გვქონია დაპირისპირებები და ვიცით, როგორი რთული მეტოქეა. ამიტომ მთელი გუნდი მაქსიმალურად კონცენტრირებულია. დარწმუნებული ვარ, გულშემატკივარი ჩვენი თავდადების და მონდომების მნახველი იქნება.“
გიორგი მიქაუტაძე:
„მოთმინებით ველოდებით მოახლოებულ თამაშებს. ‘ვილიარეალში’ თავს კომფორტულად ვგრძნობ, რაც მეხმარება ნაკრებშიც სრულად გავიხსნა. ჩვენ მიზანი ერთი გვაქვს — მოვიგოთ ორივე შეხვედრა და ექვსი ქულა მოვიპოვოთ. მარტივი არ იქნება, მაგრამ მსოფლიო ჩემპიონატზე გასასვლელად მხოლოდ გამარჯვება გვჭირდება.“
საქართველოს ნაკრები 10 ოქტომბერს ბოლო ვარჯიშს ჩაატარებს ალგორფას ქალაქში, ლა ფინკას საწვრთნელ ბაზაზე.
