ორლანდოს შეიძლება ბითაძის გაშვება მოუწიოს – მიზეზი ცნობილია

ტრადიციულად, სეზონის დასრულების შემდგომ NBA-ს გუნდები ცვლილებებისთვის ემზადებიან ხოლმე. ორლანდო მეჯიქის ხელმძღვანელობამ ამ ფანჯარაზე საკმაოდ ბევრი იმუშავა – მათ გაცვლით დესმონდ ბეინი მოიყვანეს, ამასთან ერთად, გუნდის ლიდერ პაოლო ბანკეროს ახალი და მსუყე კონტრაქტი გაუფორმეს.

მოგეხსენებათ, ლიგის წესების მიხედვით, თითოეულ გუნდს განსაზღვრული სახელფასო ჭერი აქვს. მეჯიქის მიერ გაკეთებული სვლების შემდგომ კი მომდევნო სეზონში შეიძლება ორლანდოს ამ მხრივ პრობლემები შეექმნას და თადარიგის დაჭერა გახდეს საჭირო.

ამერიკული გამოცემა Bleacher Report იტყობინება, რომ სწორედ ამიტომ, გოგა ბითაძის მომავალი ორლანდოში ბუნდოვანია. შეიძლება, მეჯიქს სახელფასო ინტერესების გამო მისი გაცვლა მოუწიოს, თუმცა, ჯერჯერობით, სად და ვის სანაცვლოდ, უცნობია.

ბითაძე კონტრაქტის მიხედვით შემდგომ სეზონში რვა მილიონ დოლარს გამოიმუშავებს. გასულ სეზონში ის როტაციის კალათბურთელი იყო და ტრავმიანობის პერიოდში ძირითადი ცენტრიც გახლდათ.