რატომ გააძევეს ბუდუ ზივზივაძე დორტმუნდთან?

ბუნდესლიგის მესამე ტურში ჰაიდენჰაიმსა და დორტმუნდს შორის გამართულ შეხვედრაში ბუდუ ზივზივაძემ კარიერის განმავლობაში პირველად წითელი ბარათი მიიღო.

31 წლის ქართველი ფორვარდი ძირითად შემადგენლობაში იყო და მატჩის მხოლოდ 21 წუთი ჰქონდა ჩატარებული, როდესაც ფელიქს ნმეჩასთან ორთაბრძოლისას უხეშად ითამაშა. დორტმუნდის ნახევარმცველი მალევე დაბრუნდა მოედანზე, თუმცა არბიტრმა ზივზივაძეს არ აპატია და ქართველს თამაშის გაგრძელების საშუალება აღარ მიეცა.

ჰაიდენჰაიმმა ათი კაცით ვერ გაძლო დიდი ხანი და პირველი ტაიმის ბოლომდე ორი გოლი გაუშვეს.

ეს ეპიზოდი ზივზივაძის კარიერაში გამორჩეული აღმოჩნდა – 15 წელზე მეტი ხნის განმავლობაში საკლუბო და სანაკრებო დონეზე წითელი ბარათი არასოდეს მიუღია. გერმანული მედიის ცნობით, ფორვარდს, სავარაუდოდ, ორი მატჩის დისკვალიფიკაცია ელის, რის გამოც ის ვერ დაეხმარება გუნდს 20 სექტემბერს ჰამბურგთან (სადაც გიორგი გოჩოლეიშვილი თამაშობს) და 27 სექტემბერს აუგსბურგთან.