როგორ მოხვდა ებრალიძე გონიოში?

ეროვნული ლიგა 2-ის კლუბი გონიო გამოცდილი შემტევით, ავთანდილ ებრალიძით გაძლიერდა. 33 წლის ფეხბურთელმა გუნდთან 1.5-წლიანი კონტრაქტი გააფორმა და კარიერას საქართველოში, საკუთარ რეგიონში გააგრძელებს.

ტრანსფერის განხორციელებაში გადამწყვეტი როლი ითამაშა საფეხბურთო მენეჯერმა გეგი კიკაბიძემ, რომელიც პორტუგალიურ სააგენტო Unik Sport-ში მუშაობს. მისი რეკომენდაციით დაინტერესდა გონიო ებრალიძით და სწორედ მისი უშუალო ჩართულობით დაიხურა ტრანსფერი.

ებრალიძეს საქართველოს ეროვნული ნაკრების, ასევე პორტუგალიისა და კვიპროსის უმაღლესი ლიგების მდიდარი გამოცდილება აქვს. ახლა კი ის საკუთარ ქალაქში ბრუნდება, რათა გონიოს მიზნების მიღწევაში დაეხმაროს.

გეგი კიკაბიძე ასე იხსენებს ტრანსფერის დეტალებს:

„მე და ავთოს ერთმანეთთან გვქონდა კონტაქტი სატრანსფერო ფანჯრამდე და სატრანსფერო ფანჯრისასაც. შევთავაზე ეს ვარიანტი, თავიდანვე უარი არ უთქვამს – დაფიქრდა და თქვა, განგვეხილა და გვემუშავა. დავურეკე გონიოს პრეზიდენტს, დავით დოლიძეს და მასაც გაუხარდა. ავთო ისეთი გამოცდილების მქონე ფეხბურთელია, რომ უმაღლესი ლიგის გუნდებსაც გამოადგებოდა. გარკვეული პერიოდი მოლაპარაკებები მიმდინარეობდა და საბოლოო ჯამში, გონიოს ამბიციური გეგმებიდან და მიზნებიდან გამომდინარე, რაც დათო დოლიძეს აქვს, ავთოც დაინტერესდა. მისთვის მნიშვნელოვანია, რომ საკუთარ მხარეს დაეხმაროს – დასავლეთ საქართველოდან არის, შეიძლება ითქვას, რომ ბათუმი მისთვის მშობლიური ქალაქია. ეს ძალიან კარგი პრეცედენტია, როცა გამოცდილი ფეხბურთელები ბოლოს საქართველოს ჩემპიონატისთვის რაიმე ღირებულს აკეთებენ. ავთოს ეს გადაწყვეტილება კი დასაფასებელია.“