ზურაბ საკანდელიძისა და მიხეილ ქორქიას სახელობის მემორიალის ფინალი გასული წლის გამეორება იქნება და ერთმანეთს თსუ და ქუთაისი შეხვდებიან.
შარშანდელი ფინალი ძალიან დაძაბული იყო და თსუ-მ დამატებით დროში დაამარცხა. რა იქნება წელს, ამას 15 იანვარს გავიგებთ, მანამდე კი ნახევარფინალებზე ვთქვათ.
თსუ-ვსა 95:90
(25:24; 14:25; 27:19; 29:22)
თსუ მატჩის უმეტეს დროს მდევრის როლში იყო. უნივერსიტეტელებს აკლდათ უკანახაზელი, მალკოლმ დრამრაითი, მაგრამ ვეტერანი გიორგი ცინცაძე ბურთს ჩინებულად ათამაშებდა, რის ხარჯზეც თსუ-ს შეტევები უფრო მრავალფეროვანი იყო. ვსა კი უფრო სწრაფად, მობილურად თამაშობდა. შედეგად, ვსა დიდი შესვენებისთვის 10 ქულით დაწინაურდა, მაგრამ თსუ-მ თამაში მესამე პერიოდში დაალაგა და ჩამორჩენა მინიმუმამდე შეამცირა.
ვსა ბოლო პერიოდშიც ინარჩუნებდა ლიდერობას, მაგრამ თსუ-ს სწრაფი შეტევები კვენტინ ჰარდრიქტისა და გიორგი ცინცაძის სამქულიანებთან ერთად გარდამტეხი აღმოჩნდა. თსუ წინ გავიდა, ბოლო წუთებზე კი დაცვაშიც იყოჩაღა და გამარჯვებამდე მივიდა – 95:90.
ქუთაისი-რუსთავი 89:80
(10:24; 28:29; 28:8; 23:19)
გამარჯვება ქუთაისსაც გაუჭირდა. იმერული კლუბი თავიდან ძალიან ჩამორჩებოდა და მესამე პერიოდშიც გვარიანად უკან იყო, მაგრამ გამარჯვება ისე მოიპოვა, არ უნერვიულია.
დასაწყისში რუსთაველებს სროლა წუვიდათ და გიორგი ცეკვავას გაწვრთნილი გუნდი 23:5 დაწინაურდა, ხოლო დიდი შესვენების წინ 15 ქულით ლიდერობდნენ. ქუთაისმა მესამე პერიოდი 28:8 მოიგო და ყველაფერი თავის ადგილზე დააყენა.
საბოლოოდ კოტე ტუღუშის გაწვრთნილმა ქუთაისელებმა 89:80 მოიგეს და მემორიალის ფინალში თსუ-ს შეუერთდნენ.
ზურაბ საკანდელიძისა და მიხეილ ქორქიას მემორიალის 21-ე გათამაშების სატიტულო მატჩი 15 იანვარს, დიღომი არენაზე, 19:00 საათზე გაიმართება.
