საქართველოს დომინანტური თამაში ბულგარეთთან

საქართველოს ეროვნულმა ნაკრებმა მსოფლიოს 2026 წლის ჩემპიონატის საკვალიფიკაციო ეტაპზე პირველი სამი ქულა მოიპოვა.

თურქეთთან მარცხის შემდეგ, ვილი სანიოლის შეგირდებმა ბულგარეთთან გაცილებით დამაჯერებლად იასპარეზეს და მეტოქე ანგარიშით 3:0 დაამარცხეს.

ფრანგმა სპეციალისტმა შემადგენლობაში რამდენიმე ცვლილება განახორციელა: დაცვაში ლუკა ლოჩოშვილი დაწინაურდა, მარცხენა ფლანგზე ირაკლი აზაროვი გამოჩნდა, ხოლო სასტარტოში პირველად მოხვდა ნიკა გაგნიძე. კაპიტანი გურამ კაშია კი სათადარიგოთა შორის დარჩა.

პირველი რეალური შანსი ბულგარელებს ჰქონდათ, თუმცა გიორგი მამარდაშვილმა თავი კიდევ ერთხელ გამოიჩინა. მალევე „ჯვაროსნებმაც“ შექმნეს მომენტი — ოთარ კაკაბაძის დარტყმას მასპინძელთა მეკარე გაუმკლავდა.

30-ე წუთზე ანგარიში ხვიჩა კვარაცხელიამ გახსნა. ეს მისი მე-20 გოლია ეროვნულ ნაკრებში, რითაც დროებით გაუთანაბრდა გიორგი მიქაუტაძეს. ტაიმის ბოლოს კი ზურიკო დავითაშვილის შესანიშნავი გადაცემის შემდეგ ნიკა გაგნიძემ ნაკრებში სადებიუტო გოლი გაიტანა და საქართველოს ორბურთიანი უპირატესობა მოუტანა.

მეორე ნახევარში უპირატესობა კვლავ ქართველებს ეკუთვნოდათ. 66-ე წუთზე გიორგი მიქაუტაძემ ახლო მანძილიდან გაიტანა და საკუთარი გოლების რიცხვი 21-მდე გაზარდა, რითაც კიდევ უფრო მიუახლოვდა შოთა არველაძის რეკორდს (26 გოლი).

დარჩენილ წუთებში ანგარიში აღარ შეცვლილა და სანიოლის გუნდმა დამაჯერებელი გამარჯვება მოიპოვა.

საინტერესოა, რომ საქართველომ ბულგარეთი ისტორიაში მესამედ დაამარცხა (3 მოგება, 2 ფრე, 4 მარცხი).

ორ ტურში ჯვაროსნებს 3 ქულა აქვთ. ოქტომბერში საქართველოს ნაკრებს ურთულესი გამოცდები ელის: 11 ოქტომბერს ესპანეთს ესტუმრება, ხოლო 14-ში თურქეთს კიდევ ერთხელ შეხვდება, ამჯერად სტუმრად.