წარუმატებელი ამხანაგურები

მონტენეგრომ კვლავ დაგვჯაბნა. საქართველოს 19 წლამდე ნაკრებზე ვსაუბრობთ, რომელმაც სამდღიან ინტერვალში მონტენეგროელ თანატოლებთან ორ ამხანაგურ მატჩში წააგო.

ის რომ ვასილ მაისურაძის შეგირდებმა ორივე დაპირისპირება სტუმრის სტატუსით გამართეს თავის დამშვიდების საფუძველს ნამდვილად არ იძლევა. მონტენეგრო გრანდთა კატეგორიას რომ არ წარმოადგენს ყველამ კარგად ვიცით და მათთან მიჯრით ორი წაგება ნამეტანი გვგონია.

თანაც ჩვენმა 19 წლამდელებმა თუ პირველ შემთხვევაში მინიმალურად 1:2 წააგეს, მეორე მატჩში მასპინძლებმა სოლუდური სხვაობით 4:2 იმარჯვეს. ქართველ ფეხბურთელთაგან თავი რეზი დანელიამ და დავით გოგილაშვილმა გამოიჩინეს.

შეგახსენებთ, ნოემბერში ვასილ მაისურაძის გუნდი ევროპის ჩემპიონატის პირველ საკვალიფიკაციო ეტაპში ჩაერთვება, რომელიც ხორვატიაში გაიმართება და მასპინძლების გარდა საქართველოს 19 წლამდე გუნდის მეტოქეები გიბრალტარი და სერბეთი იქნებიან.