იბერია ჩამორჩენაშია, ბათუმი მოულოდნელად დამარცხდა

ეროვნული ლიგის 25-ე ტურის შემდეგ სატურნირო ცხრილის სათავეში სიტუაცია შეიცვალა – გორის დილამ უპირატესობა გაზარდა და მეორე ადგილზე მყოფ იბერიას უკვე 4 ქულით უსწრებს.

ცოტა ხნის წინ მოქმედი ჩემპიონი ჯერ კიდევ ლიდერობდა, თუმცა ზედიზედ ორი მარცხის შემდეგ გია გეგუჩაძის გუნდი დაქვეითდა. დინამო თბილისთან შეხვედრაში იბერია სწრაფად დაწინაურდა – ანგარიში გურამ გოშთელიანმა გახსნა, მაგრამ უპირატესობა ვერ შეინარჩუნეს. დედაქალაქელთა მხრიდან გიორგი ხარიაშვილმა ჯერ ანგარიში გაათანაბრა, შემდეგ კი საგოლე გადაცემა გააკეთა, რასაც ირაკლი სირაძის გამარჯვების გოლი მოჰყვა.

ამ შედეგით იბერია 49 ქულაზე დარჩა და ლიდერობა დაკარგა. დინამო თბილისმა კი მოუგებელი სერია დაასრულა და 41 ქულით მესამე პოზიციაზეა.

ტურის ერთ-ერთი სიურპრიზი ბათუმში დაფიქსირდა, სადაც დინამო თელავთან დამარცხდა. სტუმართა შორის ინიგო მარტინმა პირველ ტაიმში დუბლი შეასრულა, მეორე ნახევარში კი ანდრია დევდარიანმა სხვაობა სამამდე გაზარდა. მასპინძლებმა მხოლოდ უერდი მარას გოლით შეძლეს ანგარიშის შემსუბუქება.

აღსანიშნავია, რომ ბათუმელები ჯერ კიდევ 29-ე წუთიდან ათი ფეხბურთელით თამაშობდნენ – რევაზ ჩიტეიშვილი წითელი ბარათით მოედნიდან გააძევეს. ამ დროისთვის დინამო ბათუმს 35 ქულა აქვს და მეხუთე ადგილზეა, თელავი კი 22 ქულით მეცხრე პოზიციას იკავებს.

25-ე ტური შაბათს ორი დაპირისპირებით დასრულდება: კოლხეთი ტორპედოს უმასპინძლებს, ხოლო გარეჯი გაგრას მიიღებს.