აიამ ხვამლი ქულით დაამარცხა

ქუთაისის აიამ თბილისის ხვამლს დაძაბულ ბრძოლაში 20:19 სძლია, ოთხი ტურის შემდეგ 14 ქულა მოაგროვა და, ჯერჯერობით, სატურნირო ცხრილში მეორე ადგილზეა.

crocobet დიდი 10-ის მეოთხე ტურის შეხვედრა „აია არენაზე“ გაიმართა. მასპინძლები ხშირად ცდებოდნენ, განსაკუთრებით დერეფანში, მაგრამ დასკვნით წუთებში სწორედ დერეფნიდან აგორებულ მოლს მოყვა გადამწყვეტი ლელო. ხვამლი მცირედი მარცხისთვის ნუგეშ-ქულას დასჯერდა და 11 ქულით მე-4 პოზიციაზე დაეშვა.

მატჩში ლიდერი რამდენჯერმე შეიცვალა. მეორე ტაიმში წინ ძირითადად სტუმრები იყვნენ და სხვაობამ ექვსი ქულაც შეადგინა. ჩამორჩენილმა რიონისპირელებმა ჯარიმები კარში არ დაარტყეს და მათმა მცდელობამ შედეგი გამოიღო: ხუთმეტრიან დერეფანში ბოლო კაცზე მოიგეს ბურთი და მოლი ლუკა შენგელიას ლელოთი დასრულდა. მახარეიშვილმა გარდასახვა ზუსტად შეასრულა, რამაც ქუთაისელებს ქულით მოაგებინა.

მატჩის საუკეთესო მოთამაშე საბა შარვაშიძე გახდა.