ანდრეევას და ზვერევის პირველი დიდი სლემის ტიტულები

როლან გაროსის ფინალში ნეიტრალური დროშით მოასპარეზე მირა ანდრეევამ პოლონელი მაია ხვალინსკა 6:3; 6:2 დაამარცხა.

ანგარიშიდანაც ჩანს, რომ ანდრეევამ მარტივად მოიგო. თუ რეიტინგებს გადავხედავთ, ეს მოსალოდნელიც იყო – მირა მერვე ჩოგანია, ხოლო ხვილინსკა – 114-ე. თუმცა, პოლონელს კარგი როლან გაროსი გამოუვიდა: საკვალიფიკაციო ეტაპიდან დაიწყო და ფინალში გავიდა. ერთია, გადამწყვეტ მატჩში მეტოქე ბევრად უკეთესი იყო.

მატჩი საათსა და 23 წუთს გაგრძელდა. საწყისი ოთხი გეიმი ბრეიკების იყო… მერე საკუთარი ჩაწოდებები მოიგეს, ხოლო მეშვიდე გეიმი ანდრეევამ წაიღო, საკუთარი მიაყოლა, კიდევ ერთი ბრეიკი და სეტიც მორჩა.

მეორე უფრო იოლი გამოდგა: ანდრეევა 5:0 დაწინაურდა, მართალია ხვალინსკამ გაიბრძოლა და ერთი ბრეიკი გაახერხა, მაგრამ იქვე ჩაწოდებაც დათმო და პარტიაც…

როლან გაროსის კაცთა ფინალი ხანგრძლივი და ხუთსეტიანი გამოდგა. გერმანიის დროშის ქვეშ მოთამაშე ალექსანდრ ზვერევმა იტალიელი ფლავიო კობოლი 6:1; 4:6; 6:4; 6:7; 6:1 დაამარცხა და დიდი სლემის ტურნირი პირველად მოიგო.

მატჩი 4 საათსა და 19 წუთს გაგრძელდა. ზვერევი სეტებში მუდმივად წინ იყო. იტალიელმა ორჯერ გაათანაბრა, მაგრამ გადამწყვეტი სეტი ისევ ზვერევმა წაიღო.

გერმანელი აქამდე ორ ფინალში იყო ნამყოფი – 2020 წელს ამერიკაში და 2025 წელს ავსტრალიაში. სხვა შემთხვევებში მეოთხე რაუნდს არ გაცილებია და…

თუმცა, ისიც ვთქვათ, რომ ზვერევს გაუმართლა. ჯერ იყო ტურნირს კარლოს ალკარასი ჩაეხსნა, შემდეგ ბულონის ტყე მიყოლებით დატოვეს დანილ მედვედევმა, იანიკ სინერმა და ნოვაკ ჯოკოვიჩმა. ძირითადი კონკურენტების გარეშე კი, ზვერევი ფინალში მშვიდად გავიდა. მართალია, გადამწყვეტ მატჩში ბრძოლა მოუწია, მაგრამ დიდი ოფლის ღვრა არ დასჭირვებია…